Sunday, April 30, 2006

தேர்தல் அலசல் - 2006 - தேனி


யாருக்கு தேனி?
தேனி: மொத்தம் 5 தொகுதிகள்.

1.போடி நாயக்கனூர் 2. பெரியகுளம் 3. தேனி 4.ஆண்டிபட்டி 5. கம்பம்

1.போடி நாயக்கனூர் :
எஸ்.லட்சுமனன் (திமுக) - (கூட்டணி பலம், விவசாய சலுகை அறிவிப்புகள் +)
ஆர்.பார்த்திபன் (அதிமுக)

அதிமுக சிட்டிங் இராமராஜ் தற்போது நிற்கும் பார்த்திபனுக்கு ஆதரவாக பிரச்சாரம் செய்கிறார் அதிமுகவிற்கு இது பலமான தொகுதி. அவர்களது வாக்கு வங்கியை தக்க வைத்துக் கொண்டாலே போதும் ஆனால், திமுக வேட்பாளர் செட்டியார் சமூகத்தைச் சேர்ந்தவர். அதிமுகவில் உள்ள செட்டியார்களே இவரை ஆதரிக்கிறார்கள். அருந்ததி சமுதாய மக்கள் இங்கு கணிசமாக உள்ளனர். அவர்கள் அதிமுகவிற்கு ஆதரவு தருவதாக உள்ளது. குரங்கனி - டாப்ஸ்டேசன் ரோடு, இலவம்பஞ்சு தொழிற்சாலை, 18ம்கால்வாய், பாதள சாக்கடைத் திட்டம் போன்றவற்றை நிறைவேற்றித் தருகிறோம் என வாக்கு கேட்கின்றன இரு கட்சிகளும். திமுக தேர்தல் அறிக்கை விவசாயிகளுக்கான சலுகைகள் பல அறிவித்து இருப்பதாலும், கூட்டணி பலத்தாலும் திமுகவிற்கு போடி கிடைக்கலாம்.


2. பெரியகுளம் :
எல்.மூக்கையா (திமுக)
ஓ. பன்னிர்செல்வம்(அதிமுக) - (அமைச்சர் பெதுப்பணித்துறை, நெடுஞ்சாலை...)-
(பணபலம், தொகுதியில் செல்வாக்கு +)

பெரியகுளத்தில் முன்னால் முதல்வர் (மாற்றாக குறைவான காலம் இருந்ததலும் இவர் முன்னால் முதல்வர்தானே?) இந்நாள் அமைச்சர் பன்னீர்செல்வம் போட்டியிடும் தொகுதி. அதிமுக மிக சுறுசுறுப்பாக களத்தில் இருக்கிறது. கிராமங்கள் வழக்கம் போல ரெட்டலைக்குத்தான் ஆதரவு தெரிவிக்கின்றன. தினமும் கூட்டங் கூட்டமாக வந்து அதிமுகாவில் இணைகிறார்களாம் சின்ன கட்சிகளில் உள்ளவர்கள். இத் தொகுதியில் பல சமூகங்கள் வாழ்ந்தாலும் சிறுபான்மை மக்களும், தலித் மக்களும்தான் வெற்றியை தீர்மானிப்பவர்கள். முஸ்லிம் ஓட்டுக்கள் மூக்கயையனுக்குத்தான். ஆதி மக்களிலிடையே செல்வாக்குள்ளவர் பரட்டையன் இவர் அதிமுகதான் ஆனால் இவர் தம்பி திமுக. நாடாளுமன்றத் தேர்தலின் போது முஸ்லிம்களுடன் முட்டிக் கொண்டது, அதிமுகவில் உள்ள பரட்டையனுடன் பகை கொண்டது, அத் தொகுதி மக்களின் தேவையான மாம்பழ தொழிற்சாலை அமைத்தல், அடுக்கம் வழியாக கொடைக்கானலில்லிருந்து பெரியகுளம் வரை சாலை (மலை மக்களுக்கு உதவும் வகையில்), வவ்வால் துறை அணை ஆகியவற்றைக் கிடப்பில் போட்டது போன்ற ஏகப்பட்ட பள்ளங்கள் இருந்தாலும், பணத்தைக் கொட்டி அப்பள்ளங்களை மூடிவிட்டு அதன்மேல் வெற்றிப் பயணம் செய்வார் பன்னிர்செல்வம்.

3. தேனி :
என்.டி.ஆர்.ராஜ்குமார்(காங்கிரஸ்) -(சொந்த பலமும், கூட்டணி பலமும்+) ஆர்.டி.கணேசன்(அதிமுக) - சிட்டிங்
சிட்டிங் எம்.எல்.ஏ கணேசனின் மீது தொகுதி மக்களுக்கு அதிருப்தி இருக்கிறது. இதைப்போக்க எம்.எல்.ஏ. கணேசனின் மனனவி, ஜெயலட்சுமி கிராமம், கிராமமாக சென்று வாக்கு சேகரித்து வருகிறார், நடிகர், நடிகைகளை கூட்டமாக கூட்டி வந்து நகர்களில் பிரச்சாரம் செய்கிறது தேனி மாவட்ட அதிமுக. தேனித் தொகுதியின் குடிநீர் தட்டுப்பாடு வெற்றி, தோல்வியை முடிவு செய்யும். தலித் மக்கள் பெரும்பான்மையாக உள்ள இத் தொகுதியில் புதிய தமிழகம் சின்னபாண்டி பகுஜன் சமாஜ் கட்சியில் போட்டியிடுகிற்றா. தலித் மக்கள் ஓட்டுக்களை இவர் பிரிப்பார். ஆனாலும் காங்கிரஸ் வேட்பாளரின் சொந்த பலமும் கூட்டணி பலமும் வெல்ல வைக்கும்.

4.ஆண்டிபட்டி:
ஜெ.ஜெயலலிதா (அதிமுக) - முதல் அமைச்சர் (நிறைய +++)
பா.சீமான் (திமுக)

முதல்வர் தொகுதி. அவரை எதிர்த்தி நிற்கும் இயக்குனர் சீமான் இராமநாதபுரத்தைச் சேர்ந்தவர். வெளியூர்காரார் இங்கு நிற்பது உடன்பிறப்புகளுக்கு வருத்தம்தான். ஆனால் போட்டி பெரிதே?. அதனால் சீமான் ஆளுங்கட்சி, காவல்துறை அனைத்தையும் சமாளித்து வாக்கு கேட்கிறார். பொன்முத்துராமலிங்கமும் (முன்னால் அமைச்சர்), மு.க.அழகரியும் தேர்தல் பிரச்சாரக் களத்தில் இறக்கப்பட்டுள்ளனர். ஆண்டிப்பட்டி இடைத் தேர்தலில் ஜெவுக்கு எதிராக தீவிர பிரச்சாரம் செய்தவர் அழகிரி எனவே ஆண்டிபட்டி அவரிடம் வழங்கப்பட்டு இருக்கிறது. கலைஞர், வாசன், தாயநிதி ஆகியோர் பிரச்சாரத்துடன் பொதுவுடமை கட்சிகளும் தெருமுனையில் மக்கள் பிரச்சனைகளை வைத்து கூட்டம் போட்டு பிரச்சாரம் செய்கின்றன. அந்தப் பக்கம்? கோடம்பாக்கமே திரண்டு வந்து பிரச்சாரம் செய்கிறது. ஜெயலலிதா ஜெயிப்பார்.

5. கம்பம்:
செல்வேந்திரன் (திமுக)-(காங்கிரஸ் பலம் +)
ராமகிருஷ்ணன் (மதிமுக)

காங்கிரஸ் ஓ.ஆர். ராமசந்திரன் 3 முறை வென்ற கம்பம் இப்போது திமுக வசம். கம்பம் மதிமுக வேட்பாளரை ஆதரித்து வைகோ, காங்கிரஸ் நெல்லைக்கண்ணன் மற்றும் சில நடிக நடிகைகள் விறு,விறு பிரச்சாரம் செய்தனர். அந்தப்பக்கமும் ஆர்.எம்.வீ, வெற்றி கொண்டான், நடிகர்கள் பிரச்சாரம் செய்தனர். அரசு ஊழியர்களின் ஓட்டுக்கள் திமுக பக்கம், டாஸ்மார்க் ஊழியர்கள் அதிமுக பக்கம். கம்பம் பள்ளத்தாக்கு விவாசயம் செழித்து நடக்குமிடம். விவசாயக் கடன் தள்ளுபடி நல்ல பலன் தரும் திமுகவிற்கு. இங்கு அதிக மகசூல் ஆகும் திராட்சை களுக்கு உரிய விலைகள் கிடைக்காது. ஒயின் தொழிற்சாலை அமைத்துத் தருகிறேன் எனக் கூறி வாக்கு கேட்கிறார் தேமுதிக சார்பில் நிற்கும் ஜெயநாத். கம்பம் செல்வேந்திரனுக்குத்தான் கம்பம்.
தேனி இயற்கை வளம் நிரம்பிய மாவட்டம். அநேக தெற்கத்திய மாவட்டங்கள் விவசாய பூமிதான் ஆனாலும் தேனி முழுக்க, முழுக்க ஒரு விவசாய மாவட்டம். பெரியகுளத்தில் மாம்பலம், தேனியில் கரும்பு, போடியில் ஏலக்காய், இலவம் பஞ்சு கம்பத்தில் திராட்சையென இயற்கை சிரிக்கும் மாவட்டம். ஆனால் இதைப் பயிர் செய்யும் விவசாயிகள் சிரிக்கிறார்களா?., அதற்குதான் கட்சிகளின் தேர்தல் அறிக்கைகள் போட்டி போட்டுக் கொண்டு விவசாயக் கடனை ரத்து செய்கின்றன. தேர்தல் அறிவிப்புக்கு முன்னும், பின்னும் சலுகைகள் அருவியாய் கொட்டிக்கொண்டிருக்கிறது. விவசாய சலுகைகள் அனைத்து மாவட்டங்களுக்கும் பொதுவனவைதான் என்றாலும் இம்மாவட்ட வெற்றியை கருத்தில் கொண்டே இரு பெரும் கட்சிகளின் தேர்தல் அறிக்கைகளும் உழவர்களைத் தாலாட்டுகின்றன. இத் தாலட்டுகள் மயங்கவைக்கலாம், ஓட்டுப் போடும் காலம் வரை உழவர்களை உறங்க வைக்கலாம். ஆனால் உழவர்களின் உண்மையான தேவை என்ன?. முல்லைப் பெரியாறு அணையில் 6 அடி நீரை அதிகம் தேக்க, உச்ச நீதிமன்றம் உத்தரவிட்டும் கேரள அரசு கட்டுப்படவில்லை. எலியும், பூனையுமாக கடித்துக் கொண்டிருந்த காங்கிரஸூம் கம்யூனிச கட்சிகளும் ஒன்றாக கட்டிப்பிடித்துக் கொண்டு இத் தீர்ப்பை எதிர்த்து தீர்மானம் நிறைவேற்றுகிறார்கள். 6 அடித் தண்ணீரால் கேரளாவிற்கு பாதிப்பில்லை இல்லை. ஆனால் தமிழகம் பயனடைந்துவிடக்கூடாதென பாய்கிறார்கள். இதற்கான முயற்சி ஆளுங்கட்சி எடுத்தது... ஆனால் அதன் 'ஜென்மப் பகைவர்களையும்' அரவணைத்துப் போராடி இருந்தால் இதற்கொரு முடிவு கிடைத்திருக்கும். மலையிலிருந்து பெரியகுளம் வந்து பொருட்களை விற்க மலைவாழ் மக்கள் படும் அவதி 35 மைல்கள் சுமையுடன் சுற்றி வரவேண்டும். இம்மாவட்டத்தின் ஒவ்வொரு தொகுதியிலும் இருக்கிறது இத்தகைய சாலைப் பிரச்சனைகள். அதை தீர்ப்பதாக கூறி ஆயிரம் சாலைத் திட்டங்களும் துவக்கப்பட்டது. எளிய மக்களை மனதில் கொண்டு எந்தக் கட்சி இயங்குகிறதிங்கு?. அரசு ஊழியர்களுக்காக போராட ஆயிரம் அமைப்புகள் உண்டு. வாழ்நாள் முழுதுவம், 'தான் தினமும் உழைத்தால் உணவு' என்றுள்ள மக்களை அரவணைக்க யார் இருக்கிறார்கள்?. தேனியில் கரும்பை விளைவித்து ஆலையில் (அதுவும் விவசாயிகள் செலவில்) கொட்டினாலும், அதற்கான காசுக்காய் காலமெல்லாம் காத்திருக்க வேண்டியுள்ளது. போடியில் இலவம்பஞ்சு தொழிற்சாலை இல்லை... இவ்வளவுகாலம் இதெல்லாம் இருந்த பிரச்சனைகள்தானே? அப்புறமென்ன தேர்ந்தெடுத்தால் நடக்கும் என்பது... சரி... அதிமுக சார்பில் ஜெயலலிதாவும், பன்னிர் செல்வமும் வெல்லும் வாய்ப்புள்ளது. முன்னால் அதிமுக எம்.பி கோபால் (எம்.எல்.ஏ வாகவும் இருந்திருக்கிறார்) திமுகவை ஆதரிக்கப் போகிறார். எனவே இப்பகுதியில் அதிகம் இருக்கும் ஒக்கலிக கவுட சமூக ஓட்டுகள் திமுகவிற்கு சாதகமாக அமையும்.
கடந்தமுறை இம்மாவட்டத்தில் உள்ள 5 இடங்களில் 4 களை அதிமுகவும், 1 இடத்தை கூட்டணி கட்சியான த.மா.கவும் களை அதிமுகவும், 1 இடத்தை கூட்டணி கட்சியான த.மா.கவும் கைப்பற்றின. இப்போது 3 இடங்கள் திமுக கூட்டணிக்கு உறுதியாக கிடைக்கலாம்.
திமுக - 2, காங்கிரஸ் - 1
அதிமுக - 2
வெல்வதற்கு வாய்ப்புள்ளவர்கள் :
செல்வேந்திரன் (திமுக)
எஸ்.லட்சுமனன் (திமுக)
என்.டி.ஆர்.ராஜ்குமார்(காங்கிரஸ்)
ஜெ.ஜெயலலிதா (அதிமுக)
ஓ. பன்னிர்செல்வம்(அதிமுக)
தேனி நண்பர்கள் கருத்துக்களைச் சொல்லுங்கள்.
கன்னியாகுமரி மாவட்ட கணிப்பு.
நெல்லை நிலவரம்.
தூத்துக்குடி மாவட்டம்
இராமநாதபுரம் மாவட்டம்
சிவகங்கை மாவட்டம்

தேர்தல் அலசல் - 2006 - மதுரை


முத்தா? மாணிக்கமா?

மதுரை : மொத்தம் 10 தொகுதிகள்.

1.மேலூர் 2. சோழவந்தான் 3. சமயநல்லூர் 4. மதுரை கிழக்கு 5. மதுரை மேற்கு 6. மதுரை சென்ட்ரல் 7.உசிலம்பட்டி 8.திருமங்கலம் 9. திருப்பறங்குன்றம் 10.சேடபட்டி

1.மேலூர்:
ரவிச்சந்திரன் (காங்கிரஸ்) -(கூட்ட்ணிபலம்+)
ஆர்.சாமி (அதிமுக) - சிட்டிங்

காங்கிரஸ், திமுக பலமாக உள்ள தொகுதி எனவே இத் தொகுதியை காங்கிரஸ்க்கு விட்டுக் கொடுத்திருக்கிறார்கள். சிட்டிங் ஆர்.சாமி மீண்டும் நிற்கிறார் அதிமுகவிற்காக. தெமுதிக சார்பில் ராமகிருஷ்ணன் நிற்கிறார். கிராமப்பகுதிகள் அனைத்தும் அதிமுகவிற்கு ஆதரவளிக்கின்றன. ஆனால் நகர்புற ஓட்டுக்கள் ரவிச்சந்திரனுக்குத்தான் சதகமாக உள்ளது. இத்துடன்கூட்டணி பலம், தேர்தல் அறிக்கையில் விவசாயிகள் நலன் அனைத்தும் சேர்த்து காங்கிரஸ் வெல்ல வாய்புண்டு." கை " வரும் மேலூர்.

2. சோழவந்தான் :
பி.மூர்த்தி (திமுக) -( கூட்டணிபலம் +)
ஐ.மகேந்திரன் (அதிமுக)

சிட்டிங் வீ.ஆர் ராஜாங்கத்திற்கு சீட்டில்ல. திமுகவில் நின்று தோற்ற மூர்த்திக்கு மீண்டும் இங்கு நிற்க வாய்ப்பு. திமுக எல்.சந்தானம் இடை விடாது பிர்ச்சாரம் செய்கிறார் திமுக வெட்பாளருக்காக. திமுக மூர்த்தியோ பொதுக்கூட்டங்கள், தெரு முனைப் பிரச்சாரம் என உற்சாகமாக வலம் வருகிறார் தொண்டர்படையுடன். தேமுதிக ராஜேந்திரன் முரசை ஒலித்தபடி வீடு வீடாக சென்று , தண்ணீர் பிடிப்பவர்களிடம் என பார்க்குமிடமெல்லாம் வாக்கு சேகரிக்கிறார். பார்வர்டு அவர் சத்துக்கு பிரச்சாரம் செய்து வருகிறார். திமுக மாசெ மூர்த்திக்கு உள்ளது வாய்ப்பு.

சமயநல்லூர்

ஏ.தமிழரசி ரவிக்குமார்(திமுக) -(கூட்டணி பலம்+)
பி.லட்சுமி (அதிமுக)

மதுரையிலேயே பெரிய தொகுதி. பெண்கள் மோதும் தொகுதி. சிட்டிங் பி.பொன்னம்பலத்திற்கு தொகுதியில் உள்ள நல்ல்ல்ல பெயர் (எப்ப அவர் ஓட்டுக்கேட்டு வருவார் என மக்கள் காத்திருக்கிறார்களாம்). அதிமுக வேட்பாளருக்கு பாதிப்பு. மாசெயின் முழு ஆதரவுடன் களத்தில் இருந்தாலும் அதிமுக கோஷ்டி குழப்பத்தால் தவிக்கிறார் லட்சுமி. குலமங்கலத்தில் இவர் பிரச்சாரம் செல்ல, இரண்டு கோஷ்டிகளுக்குள் நடந்த சண்டையில் எம்.எல்.ஏவை மீட்டு பாதுகாப்பாக அழைத்து வந்திருக்கிறார்கள். திமுக சார்பில் தமிழரசி நிற்கிறார். இத் தொகுதியில்(1996ல்) லட்சம் வாக்குகளுக்கு மேல் பெற்று வென்ற திமுக சமயநல்லூர் செல்வராஜை ஓரங்கட்டிவிட்டு மா.செ .மூர்த்தியே பிரச்சாரத் திட்டங்கள் கொடுக்கிறார். கூட்டணி பலத்தால் திமுக வெல்லலாம்.

4. மதுரை கிழக்கு:
நன்மாறன் (சிபிஐ (எம்) - சிட்டிங்-(கூட்டணி பலம், சொந்த செல்வாக்கு, கட்சி பலம்++)
மூ.பூமிநாதன் (மதிமுக)

குறைந்த வாக்காளர்களைக் கொண்ட தொகுதியான மதுரைக்கிழக்குத் தொகுதியில்கம்யூனிஸ்ட் கட்சிகளின் குறிப்பாக ஐபிஐ (எம்) ன் செல்வாக்கு மிக்க தொகுதி. கடந்தமுறையும் சிபிஎம் நன்மாறன் தான் வென்றிருக்கிறார். எதிர்தரப்பும் இத் தொகுதியை கூட்டணி கட்சியான மதிமுகவிற்கு தந்துள்ளது மதிமுக பூமிநாதன் இங்கு நிற்கிறார். நன்மாறன் எளிமையாலும் தன் உழைப்பினாலும் மக்களை கவர்ந்தவர். பூமிநாதன் முக்குல ஓட்டுக்களைகள் வரும் என்ற நம்பிக்கையிலிருக்கிறார். ஃபார்வர்டு ப்ளக் வேட்பாளர் என். சுப்பையா அதிமுக ஓட்டுக்களை பிரிக்கக்கூடும். தொகுதி செல்வாக்கும், நல்லபெயரும், கூட்டணி பலமும் நன்மாறனை மீண்டும் தேர்ந்தெடுக்க வைக்கும்.

5. மதுரை மேற்கு:
என்.பெருமால்(காங்கிரஸ்) --(கூட்டணி பலம்+)
எஸ்.விசண்முகம்(அதிமுக).

பீ.டி.ஆர். பழனிவேல் ராஜன் தொகுதி கங்கிரஸ்க்கு சென்று விட்டது. சிட்டிங் வளர்மதி ஜெபராஜ். அதிமுக சண்முகம் முழுவீச்சில் பிரச்சாரம் செய்கிறார். காங்கிரஸ் தரப்பும் கூட்டணியுடன் களமிறங்கினாலும், கிராம புறங்கள் அதிமுகவிற்கு சாதகமாக இருக்கிறது. தேமுதிக மணிமாறனும் களத்தில் இருக்கிறார். கடினமான தொகுதிதான் என்றாலும் அழகிரியின் உழைப்பு, கூட்டணிகட்சிகளின் ஆதரவைக் கொண்டு பர்த்தால் பெருமால் வரலாம்.

6. மதுரை சென்ட்ரல்:
பி.டி.ஆர். பழனிவேல்ராஜன்(திமுக) - (கூட்டணி, சொந்த செல்வாக்கு, கட்சி பலம்++)
எஸ்.கே.டி.ஜக்கையன்(அதிமுக).

முன்னால் சபாநாயகர் பி.டி.ஆர். போட்டியிடும் தொகுதி. மதுரையிலேயே சிறிய தொகுதி. கடந்த முறை அவர் மதுரை மேற்கில் நின்று, வளர்மதி ஜெபராஜிடம் 700 வாக்குகள் வித்தியாசத்தில் தோற்றார். அழகிரி ஆதரவு அப்போது அவருக்கு இல்லாததாலேயே அது நடந்தது. இம்முறை தங்கம் தென்னரசு, தளபதிக்காக அருப்புக் கோட்டையிலும், சேடபட்டியிலும் அழகிரி முகாமிட்டு இருந்தாலும். பி.டி.ஆரும் தனக்காக பிரச்சாரம் செய்ய அழைத்திருக்கிறார். இத் தொகுதியில் கடந்த மூன்று முறை காங்கிரஸ் வென்று இருக்கிறது. மட்டுமில்லாமல், திமுக ஆட்சியில் பல சாதனைகளை மதுரை மக்களுக்காக செய்துள்ளார் பி.டி.ஆர். போனமுறை வளர்மதிதானே?ன்னு விளையாட்டா இருந்து கோட்டைவிட்ட மாதிரி, இம்முறை இருந்தால் கூட, பி.டி.ஆரின் சொந்த செல்வாக்கும், அழகிரியின் செல்வாக்கும், கூட்டணி கட்சிகளின் பலமும் சேர்ந்து இம்முறை வெற்றி நிச்சயம். இங்கு மத்திய தர மக்களின் வாக்கு வங்கி யாருக்கோ அவர் வெல்வார். அரசு ஊழியர்கள் நிறைந்த தொகுதியிது. வைகை 2 ஆவது குடிநீர்த்திட்டம், தேர்தல் அறிக்கை ஆகியவற்றை முன்னிலைப் படுத்தி பிரச்சாரம்செய்கிறது திமுக தரப்பு. மதுரை சென்ட்ரலின் அதிமுக வேட்பாளர் யாருப்பா? எஸ்கேடி ஜக்கையனா? பார்வர்டு கட்சியிலிருந்து பிரிந்து வந்த உசிலம்பட்டி. எல்.சந்தானம் இல்லையா?. அதிமுக வேட்பாளர் ஜக்கயனாக இருந்தால் அவரை மக்கள் எப்போது வேண்டுமானலும் சந்திக்கும் வகையில் எளிமையானவர். யார் எதிர்த்து நின்றாலும் சரி ., மதுரை சென்ட்ரல் பழனிவேல் ராஜனுக்கே.

7.உசிலம்பட்டி:
பி.வி.கதிரவன்(திமுக)
ஐ.மகேந்திரன் (அதிமுக) - (பணபலம் +)

பார்வர்டு பிளாக்கின் பலமானதொகுதி. கடந்த இரு முறையும் ஃபார்வர்டு ப்ளாக்தான் வென்றுள்ளது. பாப்பாப்பட்டி, கீரிப்பட்டி ஊராட்சிகள் இரண்டும் இத் தொகுதியில்தான் இருக்கிறது. முக்குலத்தோர் வாக்குகள் வெகுவாக வெற்றி வாய்ப்பை தீர்மானிக்கும். ஃபார்வர்டு ப்ளாக் நிச்சயம் இத்தொகுதியில் கணிசமான வாக்குகள் பெறும். திமுகவில் இருக்கும் அதிருப்தியாளர்களின் உள்குத்து வேலைகள் அனைத்தும் கதிரவனுக்கு சறுக்கல். பணபலமுள்ள நகர்மன்றச் செயலர் மகேந்திரன் என்பதால் இவருக்கு ஆதரவு அதிகமாகவேயுள்ளது. இவருக்கு வரும் முக்குல ஓட்டுக்களை பார்வர்டு பிளாக் பிரிக்கும், நாடார் ஓட்டுக்கள் அதிமுகவிற்கு அதிகம் விழ வாய்ப்பில்லை. அடுத்தபடியாக அதிகம் உள்ள தலித் சமூக ஓட்டுக்கள் யாருக்கென்பதும் குழப்பமே. இங்கதான் கலைஞர் ஏதோ கேட்கப் போக, அதை ஊதி சில பேர் அவர எரிச்சல் படுத்த, மீண்டும் வாய்திறந்தார். பற்றிக் கொண்டது. தேமுதிக ஏ.கே.டி. ராஜா என்ற வேட்பாளரை இங்கு நிறுத்தியுள்ளது. கதிரவனை பளீரூட்ட அழகரி களமிறங்குவார். இப்போதைக்கு உற்சாகமாக வலம் வருவது அதிமுக மகேந்திரந்தான்.

8.திருமங்கலம் :
வ.வேலுச்சாமி(திமுக) - (கூட்டணி பலம் + )
வீர.இளவரசன் (மதிமுக)
சிட்டிங் அதிமுக காளிமுத்து. இம்முறை இத் தொகுதியை மதிமுகவிற்கு விட்டுக் கொடுத்திருக்கின்றன ரரக்கள். மேலூர் பொடா இளவரசன் மதிமுக சார்பில் இங்கு நிறுத்தப்பட்டுள்ளார். இவரை எதிர்த்து திமுக மா.செ வேலுச்சாமி நிற்கிறார். போனமுறை காளிமுத்துவை எதிர்த்து நின்று தோற்ற திமுக ஒச்சாத் தேவர் இப்போது பா.ஜ.க சார்பில் இங்கு ஓட்டைப் பிரிப்பேன் என நிற்கிறார். கூட்டணி கட்சிகளுடன் பெரிய தலைகள் பிரச்சாரத்துடன் பொலிவாக நடை போட்டுக் கொண்டிருப்பது வேலுச்சாமிதான். திருமங்கலத்தில் வேலுச்சாமிக்கு வாய்ப்புள்ளது.


9. திருப்பறங்குன்றம் :
வெங்கடேசன் ( சிபிஐ (எம்))
ஏகே. போஸ் (அதிமுக) - (பிரச்சாரம் +)
சிட்டிங் எம்.எஸ் சீனிவேலுக்கு மறுக்கப்பட்டு ஏ.கே.போஸ்க்கு கிடைத்திருக்கிறது தொகுதி. அதிமுக உள்குத்து வேலைகளுக்கு மத்தியிலும் பிரகாசமாய் இருக்கிறார் போஸ். இத் தொகுதியில் 4 முறை நின்று இருமுறை வென்றிருக்கிறார். இருந்தும் தொகுதி சிபி எம்ற்கு சென்றுவிட்டது. இது காங்கிரஸ்க்கும், கம்யூனிஸ்ட் கட்சிகளுக்கும் பலமில்லாத் தொகுதி. அதிமுக போஸ்க்கு தெரிகிறது வெற்றிமுகம்

10.சேடபட்டி:
கோ. தளபதி (திமுக) -(கூட்டணி + )
டி.துரைராஜ் (அதிமுக)

அதிமுகவின் பலமான தொகுதி. சேடப்பட்டி முத்தையா தொகுதி., அவர் 6 முறை இத்தொகுதியில் போட்டியிட்டு 4 முறை வென்றவர். அதிமுக சிட்டிங் துரைராஜ் (மாஜி அமைச்சரும் கூட) இப்போதும் போட்டியிடுகிறார். இவர் சேடபட்டியை செயல் வீரர்கள் கூட்டத்தில் குறைத்துப் பேசிவிட, அதைகேட்டு வெகுண்டெழுந்த முத்தையா அடுத்த நாளே திமுகவில் சேர்ந்துவிட்டார். இப்போது திமுக வேட்பாளர் தளபதிக்கு ஆதரவாக பிரச்சாரம் செய்கிறார். இது அதிமுகவிற்கு பாதகம். இருந்தாலும் முக்குலத்தோர் வாக்குகள் தனக்கு கிடைக்குமென நினைக்கிறார் துரைராஜ், தொகுதி மக்களின் அதிருப்தியும் இவர் மேல் உள்ளது. நாயுடு சமுகத்தைச் சேர்ந்த தளபதிக்கோ தொகுதியில் நல்ல அறிமுகம் இருக்கிறது 1996ல் 48,899 வாக்குகள் பெற்று இத் தொகுதியில் வென்றார். இங்கு பார்வர்டு பிளாக் சார்பில் நிற்கும் ராமதுறை சிங்கத்த காருக்கு முன்னாடி உட்காரவச்சுகிட்டு தொகுதிய சுத்தி வாராராம்மில்ல? (சிங்கம் பொம்மைதான்). இம்முறையும் தளபதிக்கு சேடப்பட்டி வாய்ப்பு நல்குமெனவே தெரிகிறது.


கடந்தமுறை மதுரை மாவட்டத்தில் 6 தொகுதிகளில் போட்டியிட்டது திமுக. அதிமுக அனைத்து தொகுதிகளிலும் வெற்றி பெற்றது. மதுரை மாவட்டத் திமுக வளர்ச்சிக்கு அழகிரி மிக அவசியம். போன முறை அவர் தேர்தலில் ஆர்வம் காட்டியிருந்தால். அவ்வளவு இழப்பு திமுகவிற்கு இருந்திருக்காது என்பது உறுதி. படித்த மக்கள் வசிக்கும் மதுரை சென்ட்ரலிலாவது திமுக வென்றிருக்கும்.
திண்டுக்கல் நண்பர்கள் கருத்துக்களைச் சொல்லுங்கள்.
கன்னியாகுமரி மாவட்ட கணிப்பு.
நெல்லை நிலவரம்.
தூத்துக்குடி மாவட்டம்
இராமநாதபுரம் மாவட்டம்
சிவகங்கை மாவட்டம்
விருதுநகர் மாவட்டம்
தேனி மாவட்டம்
நாகை மாவட்டம்
புதுகை மாவட்டம்
திண்டுக்கல் மாவட்டம்

தேர்தல் அலசல் - 2006 - சிவகங்கை



சிவகங்கை யாருக்கு?

சிவகங்கை : மொத்தம் 5 தொகுதிகள்.
1.திருப்பத்தூர் 2.இளையான்குடி 3.கரைக்குடி 4. மானா மதுரை 5.சிவகங்கை.

1.திருப்பத்தூர் :
கே.ஆர். பெரியகருப்பன் (திமுக) -(யாதவ சமுதாய ஓட்டுக்கள் மொத்தமாக கிடைப்பது, கூட்டணி பலம் +)
கே.கே. உமாதேவன்(அதிமுக)

இரண்டு கட்சியின் மாவட்டச் செயலாளர்கள் மோதுகிறார்கள். திமுகவின் மா.செ பெரியகருப்பன் களத்தில். அழகிரி அதரவாளர் சிவராமனுக்கு சீட் மறுக்கப்பட்டதால் திமுகவினருக்கு வருத்தம். எம்.ஜி.ஆர் காலத்திலேயே அதிமுகவில் இணைந்து தற்போது அதிமுக மா.செவான சிட்டிங் கே.கே. உமாதேவனுக்கு மீண்டும் சீட் கிடைத்திருக்கிறது. இங்கு இருமுறை அதிமுகவில் வென்று அமைச்சராக இருந்த இராஜ கண்ணப்பன் கையிலிருந்து திருப்பத்தூரை. கே.கே உமாதேவனுக்கு மாற்றி விட்டது அதிமுக தலைமை. நெல்லைக் கண்ணன் போன்ற காங்கிரஸ் ஆட்களும் உமாதேவனுக்காக ஒட்டு கேட்கிறார்கள். யாதவ ஓட்டு வங்கியை தன் பாக்கெட்டில் வைத்திருக்கும் கண்ணப்பன் திமுகவில் இணைந்தது பெரிய கருப்பனுக்கே சாதகம். பெரியகருப்பனும் யாதவ இனம்தான். திருப்பத்தூர் திமுகவிற்கே.

2.இளையான்குடி:
ஆர்.எஸ். இராஜ கண்ணப்பன்(திமுக) - (யாதவ சமுதாய ஓட்டுக்கள் மொத்தமாக கிடைப்பது, கூட்டணி பலம் ++)
க. அய்யாசாமி (அதிமுக)
ஆர்.எஸ். இராஜ கண்ணப்பன்(திமுக)
மக்கள் தமிழ் தேசம் திமுகவுடன் இணைந்தவுடன் சீட்டு இந்த முன்னாள் அதிமுக அமைச்சருக்கு. வென்றவுடன் அமைச்சராகலாம். தாயமங்கலம் தலைவர் அய்யாசாமிய அல்லல் பட வைக்க கண்ணப்பனின் யாதவ சமூக ஓட்டுக்கள் பணபலம் மற்றும் அமைச்சராய் அவர் இருந்தபோது திருப்பதூரில் சாதித்தது எல்லாம் இருக்கிறது. கண்ணப்பனை சமாளிக்க வேண்டும் என யாதவ இனத்ததச் சேர்ந்த எம்.பி கோகுல இந்திரா அதிமுகவால் பணிக்கப்பட்டிருக்கிறார். யாதவ இனத்திற்காக ஆரம்பிக்கப் பட்ட மக்கள் தமிழ் தேசத்தை கலைத்துவிட்டு, திமுகவிற்கு ஓடிவிட்டார். மூன்று துறைகளை இவரிடம் கொடுத்து இவரை அமைச்சராக்கிய 'அம்மா' வை விட்டு ஓடி விட்டார் என சளைக்காமல் பிரச்சாரம் செய்கிறார் இந்திரா. யாதவ ஓட்டுக்களுக்கு அடுத்த ஓட்டு வங்கி உடையார் மக்களுடையது. அதுவும் கண்ணப்பனுக்கு சாதகமாகவே இருக்கும். இதையெல்லாம் விட சிட்டிங் என்.எல்.ஏ நடராஜன் தொகுதி மக்களிடம் எடுத்திருக்கும் பேர் அய்யாச்சாமிக்கு மிகுந்த சரிவைத் தரும். நடராஜனுக்கு இரண்டு முறை அம்மா அமைச்சர் பதவி கொடுத்து, இரு முறையும் அதை திருப்பிவாங்கி கொண்டுவிட்டார்கள் (?!).உசாராக பிரச்சாரக் கூட்டத்தில் எம்.எல்.ஏ இல்லாமல் பார்த்துக்கொண்டாலும், அதிமுகவிற்குள்லேயே உள்ள கோஷ்டி பிரச்சனை வேறு மற்றொரு பக்கம் அவரை நோகடிக்கிறது. புரட்சித் தலைவி பசுமைத் தாயகம் என்ற புதிய அமைப்பின் அமைப்பாளர் வி.என்.சுந்தராஜனுக்கு அதிமுகவில் சீட் கொடுத்திருக்கலாம் என நினைக்கிறது அதிருப்தி கோஷ்டி. கண்ணப்பனுக்கு கூட்டணியில் உள்ள அத்தனை கட்சிகளும் வேலைபார்க்க, தனியாளாய் தத்தளிக்கிறார் அய்யாசாமி. தேவர்கள் பக்கமாவது திரும்பலாம் என்றால் தேமுதிக வேட்பாளர் மணிமாறனும், பி.ஜே.பி வேட்பாளர் தேவேந்திரனும் முக்குலத்தைச் சேர்ந்தவர்கள். இத்தொகுதிக்கு அடுத்த 5 வருடம் ராஜா ராஜ கண்ணப்பந்தான்.

3.கரைக்குடி:
என். சுந்தரன் -(காங்கிரஸ்) (கூட்டணி பலம் +)
செல்லையா என்ற வெங்கடாசலம்(அதிமுக)
திமுக நல்ல எண்ணிக்ககயில் வாக்குகள் பெரும் தொகுதி. இம்முறை கூட்டணி கட்சிக்கு ஒதுக்கப்பட்டுள்ளது. வேட்பாளர் சுந்தரத்தின் மீது காங்கிரஸ் மக்களே திருப்தியாக இல்லை. ஆனால் எம்.பியும், மத்திய அமைச்சருமான பா.சிதம்பரத்தின் ஆதரவாளர். ஆனால் குழப்பம் செய்பவர்கள் மீது நடவடிக்கை எடுக்கப்படும் என காங்கிரஸ் தலைமை அறிவித்து உள்ளதால் குழப்பங்கங்கள் நீங்கும். சாக்கோட்டை ஒன்றிய செயலாளர் செல்லயா அதிமுக வேட்பாளராக களமிறக்கப் பட்டுள்ளார். காங்கிரஸ் வெல்ல வாய்ப்பிருக்கிறது.

4. மானா மதுரை(தனி) :
கே.பாரமலை (காங்கிரஸ்) - சிட்டிங் - (கூட்டணி பலம் +)
ம.குணசேகரன்(அதிமுக)

காங்கிரஸின் மாநில துணைத்தலைவரும், காமராஜர் காலத்தில் இருந்து கட்சியில் இருப்பவரும் ஆன காங்கிரசின் முக்கிய தலைவர்களில் ஒருவரான கே. பாரமலை எப்போதும் நிற்கும் தொகுதி. கடந்த முறையும் எம்.எல்.ஏ அவர்தான். சுயேட்சையாக கூட ஒரு முறை வென்றிருக்கிறார் இத்தொகுதியை. குணசேகரன் முன்பு ஒரு முறை இதே தொகுதியில் போட்டியிட்டு தோல்வியுற்றார். ஜெ இங்கு வந்துவிட்டு போன பிறகு ர.ரக்கள் உற்சாகத்தில் இருக்கின்றனர். தொகுதி மக்களின் அதிருப்தியை 'சாதித்து' இருக்கிறார் பாரமலை என்றாலும் கூட்டணி பலம், காங்கிரஸ்சை மீண்டும் வெல்ல வைக்கும்.

5.சிவகங்கை
எஸ்.குணசேகரன் (சிபிஐ)
புலவர்.சிவந்தியப்பன்(மதிமுக) (மதிமுகவின் கூட்டணிபலம், காங்கிரஸ் கோஷ்டி அரசியல் +)

சுப்ரமணியன் பழைய தல காங்கிரஸில் இருந்தவரை சிவகங்கை காங்கிரஸ் கங்கையாக இருந்திருக்கிறது., சுதர்சன நாச்சியப்பன் காங்கிரஸ் சார்பாக இத்தொகுதியில் பொட்டியிட்டு தோற்ற பிற்கு அதிமுக, திமுகன்னு சுத்தி போனமுறை அதிமுகவிற்கு கிடைத்தது. இம்முறை இத் தொகுதி மதிமுகவிற்கு ஒதுக்கப்பட்டுள்ளது. போனமுறை அதிமுக கூட்டணி பலத்தால் வென்றாலும் இம்முறை சந்தேகம்தான் என நினைத்தோ என்னவோ கூட்டணி கட்சிக்கு ஒதுக்கி விட்டார்கள். அதுவும் தா.கிருட்ணனோட ஊர் என்பதால் திமுகவின் மேல் உள்ள கோபத்தை அதிமுக நின்றால் முழுதாக அள்ளமுடியாது என்று மதிமுகவை களமிறக்கி இருக்கிறாக்கிறார்கள் (வைகோ வந்து பேசி, ஒரு சொட்டு கண்ணீர்விட்டா பத்தாது?) அந்தப்பக்கம் மட்டுமென்ன? திமுக வேட்பாளரை நிறுத்தி பறிசோதனை பண்ணாமல், சிபிஐ க்கு ஒதுக்கியுள்ளார்கள். காங்கிரஸ் ஓட்டுகளும் எப்போதும் கிடைப்பது கிடைக்கும். சிபிஐ கட்சிக்கும் சக்தி சர்க்கரை ஆலையில் இருந்து விவசாமிகளுக்கு கடன் தொகையை பெற்றுத்தந்தார்கள், நிலத்தடி நீரை குளிபானக் தொழிற்சாலை உறிஞ்சுவதை தடுத்தார்கள் என நல்ல பெயர்தான். மதிமுக புலவர் செவந்தியப்பன் கூட்டணி கட்சி பிரமுகர்கள் புடைசூழ வலம் வருகிறார். இத் தொகுதி எம்.எல்.ஏ சந்திரன் மேல் உள்ள அதிருப்தியும் கம்யுனிஸ்ட்டுகளுக்கு சாதகமானதுதான். தேமுதிக இத் தொகுதியில் சுறுசுறுப்பாக உள்ளது. தன் வெற்றியை காங்கிரஸ் (சுயேட்சை) ராஜசேகரன் பார்த்துக் கொள்வார் என பொடா செவந்தியும்., சிட்டிங் சந்திரனை பிரச்சாரத்துக்கு அழைத்துப் போனால் அவர் சாதனை(?!) நம்மை அமரவைத்துவிடும் என 'குணசேகரனும்' தெம்பாக உள்ளனர். ஆனால் எல்லாவற்றையும் கூட்டி, கழித்துப்பார்த்தால் பொடா வெடி வெடிக்கலாம். செவந்தியப்பனுக்கே சிவகங்கை.
மொத்தத் தொகுதிகள் - 5. திமுக - 2 , காங்கிரஸ் - 2, சிபிஐ - 1
அதிமுக - 4, மதிமுக - 1 என களத்தில். தனது மாவட்டத்தில் 5 தொகுதிகளையும் காங்கிரஸ் கூட்டணிக்கு பெற்றுத் தர பிரச்சாரத்தில் இறங்கியுள்ளார் அமைச்சர் பா.சிதம்பரம். தா.கி மரணத்திற்கு பின்பு வரு சட்டமன்றத் தேர்தல். இம்மாவட்டத்தில் திமுக 2 இடங்களில்தான் போட்டியிடுகிறது. கடந்த முறை அதிமுக இங்கு 3 இடங்களில் வென்றது.
திமுக கூட்டணி - 4 அதிமுக கூட்டணி - 1
திமுக - 2 , காங்கிரஸ் - 2 வெல்லலாம்.

மதிமுக - 1 வெல்லலாம்.

வெல்வதற்கு வாய்ப்புள்ளவர்கள் :
கே.ஆர். பெரியகருப்பன் (திமுக)
எஸ். இராஜ கண்ணப்பன்(திமுக)
என். சுந்தரன் -(காங்கிரஸ்)
கே.பாரமலை (காங்கிரஸ்) - சிட்டிங்
புலவர்.சிவந்தியப்பன்(மதிமுக)
சிவகங்கை நண்பர்கள் கருத்துக்களைச் சொல்லுங்கள்.
கன்னியாகுமரி மாவட்ட கணிப்பு.
நெல்லை நிலவரம்.
தூத்துக்குடி மாவட்டம்
இராமநாதபுரம் மாவட்டம்

தேர்தல் அலசல் - 2006 - விருதுநகர்

சரவெடி யாருக்கு?

விருதுநகர் : மொத்தம் 6 தொகுதிகள்.

1. விருதுநகர் 2. அருப்புக் கோட்டை 3. ராஜபாளையம் 4. திருவில்லிப்புத்தூர் 5.சிவகாசி 6. சாத்தூர்

1. விருதுநகர்:
எஸ்.தாமோதரன்(காங்கிரஸ்) - சிட்டிங் (கட்சி பலம், கூட்டணிபலம் +)
இரா.வரதராஜன்(மதிமுக)

சிட்டிங் தாமோதரன் இம்முறையும் 'சீட்டிங்'. கடந்த 4 தேர்தல்களில் காங்கிரஸ் 3 முறை (தமாக 1), திமுக 1 முறை வென்றுள்ளன. நாடார், தேவர், கம்பலத்து நாய்க்கர், கம்மாள நாயுடு என பல இன மக்கள் நிறைந்துள்ள தொகுதி. தொகுதியில் நல்ல பெயர் இருக்கிறது தாமோதரனுக்கு. சென்ற தேர்தலில் 16,695 வாக்குகள் பெற்ற வரதராஜன் மதிமுக சார்பில் இம்முறையும் களத்தில். இவர் நாயுடு இனத்தைச் சேர்ந்தவர் என்பதாலும், அதிமுக உடனிருப்பதாலும் கணிசமாக வாக்குகள் பெறலாமென்றால், தேமுதிக சார்பில் சுப்புராஜ் போட்டியிடுகிறார். மதிமுகவின் ஓட்டுக்களை இவர் பிரிப்பார் மற்றும் தொகுதி கிடைக்கவில்லையே என்ற கடுப்பில் ரரஸ்... , வைகோ சிறையில் இருந்தபோது கட்சிப் பணியாற்றவில்லையே என உட்கட்சியிலேயே முனுமுனுப்பு. ஃபார்வர்டு ப்ளாக் வேட்பாளராக செல்வமும், புதிய தமிழகம் சார்பாக செல்வகுமாரன் என்பவர் நிற்கிறார். சிட்டிங் வெல்லவது சிரமம்தான் என்று தொகுதியில் நிலவும் அதிருப்தியை வைத்துச் சொன்னாலும்., கூட்டணி இருப்பதால் விருதுநகர், தமோதரனுக்கு விருது.

2. அருப்புக் கோட்டை:
தங்கம் தென்னரசு (திமுக)
க.முருகன்(அதிமுக) - (கூட்டணிபலம் +)

கடந்த 5 தேர்தல்களில் ஒருமுறை அதிமுக மறு முறை திமுக என மாறி, மாறி கைப்பற்றியிருக்கிறது அருப்புக் கோட்டையை. முன்னால் அமைச்சர். தங்கபாண்டியனின் வாரிசு தங்கம் தென்னரசுக்கு இம்முறையும் வாய்பளித்திருக்கிறது திமுக. சிட்டிங் எம்.எல்.ஏ சிவசாமிக்கு (உசாராக) மறுத்து , ஒன்றியச் செயலாளர் முருகனுக்கு வாய்ப்பு கொடுத்திருக்கிறது அதிமுக. கடந்தமுறையும் தங்கம் தென்னரசு இதே தொகுதியில் நின்று, அப்போதைய கூட்டணி பலமில்லா திமுகாவிற்கு 43,155 ஓட்டுக்கள் பெற்றார். இப்போது கூட்டணியும் இருக்கிறது, மதுரை திமுக அழகிரியும் உடனிருக்கிறார் . இருந்தும் அருப்புக் கோட்டையையெல்லாம் திமுக நம்பவே முடியாது. எல்லாம் இலைக்கு குத்திட்டு போயிருவாங்க. முருகனுக்கு அருப்புக்கோட்டை கிடக்கலாம்..

3. ராஜபாளையம்(தனி):
வி.பி. ராஜன் (திமுக) - (தொகுதியில் செல்வாக்கு, கூட்டணிபலம் +)
மு.சந்திரா(அதிமுக)

கடந்த 3 முறைகள் இத்தொகுதியில் போட்டியிட்ட வி.பி.ராஜன் இம்முறையும் களத்தில். 2 முறைகள் இத்தொகுதியிலேயே வென்று , கடந்த தேர்தலில் அதிமுக வேட்பாளரிடம் தோற்று தொகுதியை ஒப்படைத்திருக்கிறார். செல்வாக்குமிக்க ராஜபாளையம் சேர்மன் சுப்பராஜா வைகோவின் நண்பர் என்றாலும் திமுக ராஜனை ஆதரிக்கிறார். ராஜன் முன்பு இங்கு வென்ற போது வந்த சாதிக் கலவரத்தை ஒடுக்கியது முதற்கொண்டு நிறைய தொகுதிக்கு செய்துள்ளார். தொகுதியில் அதிகம் உள்ள ராஜூக்கள் சமூகம் சார்ந்தவர். அதிமுக வேட்பாளர் சந்திராவும் கூட்டணி கட்சிகளின் துணையோடு தெம்பாக வலம் வருகிறார். தேவேந்திரகுல வேளாளர்கள் இங்கு அதிகம். புதிய தமிழகமும் களிமுத்து, பார்வர்டு ப்ளாக் விஜயகுமரியும் ஓட்டுக்களை பிரிப்பர். தேமுதிகவும் அய்யனார் என்பவரை இத் தொகுதியில் நிறுத்தியிருக்கிறது... கூட்டிக்கழித்துப் பார்த்தால் ராஜ பாளையம் ராஜன் பாளையம்.

4. திருவில்லிப்புத்தூர்:
டி.ராமசாமி (சிபி ஐ) - (கூட்டணிபலம் ++)
இரா. விநாயக மூர்த்தி(அதிமுக)

திருவில்லிப்புத்தூர் தாமரைக்கனியின் கோட்டை. அவர் அவரது மகன் இன்பத்தமிழனிடமே இழந்த கோட்டை. இப்போது சிட்டிங் இன்பத்தமிழனும் இழந்த கோட்டை. கடந்த 7 தேர்தல்களை எடுத்துக் கொண்டால், 5 முறை தாமரைக் கனியும் (ஒரு முறை சுயேட்சையாக ) ஒரு முறை அவர் மகன் இன்பத் தமிழனும் வென்றிருக்கிறார்கள். ஒரே ஒரு முறை திமுக வேட்பாளர் வந்திருக்கிறார் 1989ல் (என்னா பாடு பட்டாரோ பாவம்..). 1991 ஆம் ஆண்டு நடந்த தேர்தலில் தாமரைகனி சுயேட்சையாக நின்று அதிமுக விநாயகமூர்த்தியை வென்றார். இப்போது அதே விநாயகமுர்த்திதான் திருவில்லிப்புத்தூரில் அதிமுக சார்பில் இப்போது தேர்தலில் நிற்கிறார். அம்மா எப்படி காய் நகர்த்துராங்க ?. எல்லோரும் சீட் கிடைக்கவில்லையென்றால், கொஞ்ச நாள் 'உம்முன்னு' இருந்துட்டு பிறகு பிரச்சாரத்துல ஐக்கியமாயிருவாங்க., ஆனா இன்பத்தமிழன் விநாயகமூர்த்திக்கு இன்னும் துன்பமாகத்தான் இருக்கிறார். இதைப் பயன்படுத்தி பிரச்சாரவேகம் கூட்டுது இந்திய கம்யுனிஸ்ட். இன்று திமுகவில் இணைந்து விட்டார் இன்பத்தமிழன் இது மாவட்டம் முழுவதும் திமுகவிற்கு வாக்குகளை உயர்த்தும். திருவில்லிப்புத்தூரில் திருவிழா சிபிஐக்குத்தான்.

5.சிவகாசி :
வி.தங்கராஜ்(திமுக) - (கூட்டணிபலம் +)
ஞானதாஸ் (மதிமுக)

காங்கிரஸ்க்கு சற்று செல்வாக்குள்ள தொகுதி. மதிமுகவின் செல்ல தொகுதி இது. இங்கு நாயக்கர் சமூக வாக்கு வங்கி பலமாக உள்ளது. மதிமுக ஞானதாஸ் இதே தொகுதியில் 1996ல் நின்று, 31,993 வாக்குகள் பெற்றார். தற்போது தேமுதிகவில் போட்டியிடும் ராஜேந்திரன் என்பவரும் நாயக்கர் சமுகத்தைச் சேர்ந்தவர்தான். புதிய தமிழகமும் களத்தில் உள்ளது. இத்தொகுதியில் திமுக வேட்பாளர் எப்படியும் வெல்ல ஏண்டும் என்பது தாயாநிதி மாறனின் விருப்பம். இது வைகோ தொகுதி என்பதால். முத்தொழில் வளமுள்ள ஜப்பான் சிவகாசியில குடிக்க குடி நீர் இல்லை. தாமிரபரணி, மானூர் கூட்டு குடிநீர்த் திட்டம், சிவகாசியின் கனவு திட்டமான பம்பை - அச்சன் கோவில்-வைப்பார் நதிநீர் இணைப்புத் திட்டம் போன்ற திட்டங்களைப் பற்றி யார் அக்கரை கொண்டு செயல்படுவார்களோ அவர்களுக்கே மக்கள் ஆதரவு. கூட்டணியை கணக்கில் கொண்டால் தங்கராஜீக்குத்தான் வாய்ப்பதிகம்.

6. சாத்தூர் :
கே.கே.எஸ்.ஏஸ்.ஆர். ராமச்சந்திரன்(திமுக) - சிட்டிங் (தொகுதியில் செல்வாக்கு ++)
சொக்கேஸ்வரன்(அதிமுக)
கே.கே.எஸ்.ஏஸ்.ஆர்

தமரைக்கனியின் உற்ற நண்பர் :))). அண்ணாச்சி கே.கே.எஸ்.எஸ் ஆரின் கோட்டை. கடந்த 7 தேர்தல்களில் 6 முறை இங்கு நின்றிருக்கிறார் கே.கே.எஸ்.எஸ்.ஆர். ஒரு முறை விளாத்திகுளம் அவருக்கு ஒதுக்கப்பட்டதால் இங்கு போட்டியிட வில்லை. 7 தேர்தல்களில் 5 முறை வென்றிருக்கிறார் இத்தொகுதியில் 1 முறை விளாத்திகுளத்தில் வென்றிருக்கிறார். போனமுறை மட்டும்தான் கடந்த 7 முறைகளில் எதிர்கட்சி எம்.எல்.ஏ. அவருடைய செல்வாக்கு நிறைந்திருக்கும் தொகுதி. அதுவே அவருக்கு ஒரு வகையில் சருக்கலும் கூட, இன்னும் அதிமுகலதான் இருக்காருன்னு நெனைச்சுகிட்டு இலைக்கு குத்துறது எத்தன பேரோ?. கிராமப்புறங்களில் அதிமுகவின் செல்வாக்கு கணிசமாக இருக்கிறது. அதிமுக சொக்கேஸ்வரன் புதுமுகம். அதனால் அவர் மீது ர.ர க்களுக்கு அவ்வளவு ஈர்ப்பில்லைதான். இவர் தேவாங்கார் செட்டியார் சமூகத்தைச் சேர்ந்தவர் எனவே அச்சமுதாய ஓட்டுக்கள் சுலபமாக அதிமுகவிற்கு கிடைக்கும். நாடார் சமுக மக்களும் அதிக அளவில் உள்ளனர். அதிமுக வேட்பாளருக்கு கூட்டணி கட்சிகள் தோள் கொடுக்கின்றன. மதிமுக தனித்து நின்று இத் தொகுதியில் 19338 வாக்குகள் பெற்றது கடந்த முறை. நாயக்கர் சமுகத்தின் வாக்குகள் மதிமுகவிற்கு கணிசமான வாக்குகள் பெற்றுத்தரும். அனைத்து கட்சியிலும் தாவி கடைசியில் தேமுதிகவில் சீட்டுப் பெற்ற சங்கரலிங்கம் சாலியர் சமூக ஓட்டுக்களை பெறலாம். ஆனால் கே.கே.எஸ்.எஸ்.ஆருக்கு காங்கிரஸின் செல்வாக்கும் கை கொடுக்கும். ஃபார்வர்டு பிளாக், புதிய தமிழகம் கட்சிகளும் வேட்பாளர்களை இங்கு நிறுத்தியுள்ளது. எத்தனை பேர் நின்றாலும் சாத்தூர் சாத்தூராருக்கே என்பதே நிலவரம்.
மொத்தமுள்ள 6 தொகுதிகளில்
திமுக - 4, காங்கிரஸ் - 1, சிபிஐ - 1
அதிமுக - 4, மதிமுக - 2 என போட்டியிடும் விருதுநகரில். கடந்தமுறை 3 இடங்களில் அதிமுக, 2 இடங்களில் தமாக, 1 இடத்தில் திமுக (சாத்தூர்) வென்றது. இம்முறை அருப்புக்கோட்டையில் மட்டுமே வர வாய்ப்புள்ளது. விருதுநகர் மாவட்டத்தின் முக்கியப் பிரச்சனை தண்ணீர் ... குடிதண்ணீர் தட்டுப்பாடு!. தொழிற் நகரமான சிவகாசியில் அதிமுக என்ன வளத்தை மெம்படுத்தியிருக்கிறது என்பதும் வாக்குகளைத் தீர்வு செய்யும்.
திமுக - 3, காங்கிரஸ் - 1, சிபிஐ - 1
அதிமுக - 1
வெல்வதற்கு வாய்ப்புள்ளவர்கள் :
கே.கே.எஸ்.ஏஸ்.ஆர். ராமச்சந்திரன்(திமுக)
வி.தங்கராஜ்(திமுக)
டி.ராமசாமி (சிபி ஐ)
எஸ்.தாமோதரன்(காங்கிரஸ்)
க.முருகன்(அதிமுக)
விருதுநகர் நண்பர்கள் கருத்துக்களைச் சொல்லுங்கள்.
கன்னியாகுமரி மாவட்ட கணிப்பு.
நெல்லை நிலவரம்.
தூத்துக்குடி மாவட்டம்
இராமநாதபுரம் மாவட்டம்
சிவகங்கை மாவட்டம்
தேனி மாவட்டம்

Thursday, April 27, 2006

தேர்தல் அலசல் - 2006 - இராமநாதபுரம்



பூமியில் வரட்சி., ஆனால் மூளையில் எழுச்சி. இராமநாதபுரம் எக்கட்சிக்கு?

இராமநாதபுரம் :

1.திருவாடனை 2. பரமக்குடி 3.இராமநாதபுரம் 4.முதுகுளத்தூர் 5. கடலாடி.

1.திருவாடனை:
கே.ஆர். ராமசாமி(காங்கிரஸ்) (காங்கிரஸ் கட்சி பலம் +)
சி.ஆணிமுத்து (அதிமுக)

ஆணி அடிச்ச மாதிரி சொல்லலாம் திருவாடனை பலமான காங்கிரஸ் தொகுதி. கடந்த 4 முறைகள் இத் தொகுதியில் வென்ற காங்கிரஸ் சிட்டிங் எம்.எல்.ஏ கே.ஆர். ராமசாமி இம்முறையும் போட்டி இடுகிறார். ஆரவாரமில்லாமல் அமைதியாக நடக்கிறது தேர்தல் பிரச்சாரமும், பணிகளும் இங்கு. தமிழ்நாட்டிலேயே இந்த ஒரு இடத்தில்தான் வேட்பாளர்களுக்கு ஆரத்தி சுற்றாமல், பொட்டு வைக்காது மக்கள் வேட்பாளர்கள் வந்தால் அவர்கள் சொல்லுவதை கேட்டுவிட்டு வழியனுப்பி வைக்கின்றனர். ஆணிமுத்துவை விட ராமசாமிக்கு வாய்ப்பு அதிகம்.

2. பரமக்குடி(தனி):
கே.வி.ஆர்.ராம்பிரபு (காங்கிரஸ்) - சிட்டிங் -(காங்கிரஸ் கட்சி பலம் +)
எஸ்.சுந்தராஜன்(அதிமுக)

பழம்பெரும் காங்கிரஸ் தலைவர் கே.வி.ராக்கன் புதல்வர் கே.வி.ஆர். ராம்பிரபு மிண்டும் இத்தொகுதியில் போட்டியிடுகிறார். ஆதிதிராவிட மக்கள் அதிகம் வசிக்கும் தொகுதி இது. முக்குலத்தோர், யாதவர், செட்டியார் ஓட்டுக்களும் வெற்றியை முடிவு செய்யும். தொகுதி மக்களிடம் ராம்பிரபுவிற்கு உள்ள நல்ல பெயர், அவர் தொகுதிக்காற்றிய பணி, கூட்டணி பலம் அனைத்தும் கொண்டு காங்கிரஸ் வெல்லும் வாய்ப்புள்ள தொகுதி.

3.இராமநாதபுரம்:
ஹசன் அலி (காங்கிரஸ்) - (கூட்டணி, பண பலம் +)
கராத்தே பழனிச்சாமி(மதிமுக)

40 வருடங்களுக்குப் பிறகு இத்தொகுதியில் காங்கிரஸ் போட்டி இடுகிறது. அதிமுக தொழிலாளர் நலத்துரை அமைச்சர் அன்வர் ராஜாவுக்கு மறுக்கப்பட்டு மதிமுக பழனிச்சாமிக்கு கொடுக்கப்பட்டுள்ளது. அதிமுக, திமுக மாறி, மாறி வென்ற தொகுதி. வள்ளல் சீதக்காதி குடும்பத்தைச் சேர்ந்தவர் ஹசன் அலி. வழக்கம்போல இவருக்கு சீட் கிடைத்ததை பொறுக்கமாட்டாத கங்கிரஸ் எதிர் கோஸ்டி இவர் தொழிற் நிமித்தம் வெளிநாடு சென்று வருவதை பயன்படுத்தி அவர் வெளிநாட்டுக்காரார் என பரப்பி வந்தனர். அதுவே பழனிச்சாமிக்கு மிக சாதகமான பிரச்சாரமாக இருந்தது. அங்கு மட்டுமென்ன?. அமைச்சர் அன்வர் ராஜாவுக்கு தொகுதி மறுக்கப்பட்டு கூட்டணி கட்சிக்குக்குப் போனதால் அதிமுகவினரும் சலிப்பான மனநிலையில் தான் தேர்தல் பிரச்சாரத்தை ஆரம்பித்தனர். அதிமுகவிற்குள் உள்ள கோஷ்டி பூசலை மறந்து தொகுதியை அதிமுகவிற்கு பெற்று தருவதற்காக சூழுரைத்து இறங்கியுள்ளன அன்வர் கோஷ்டியும். மா.செ. முருகேசன் கோஷ்டியும். பணபலமுள்ள செல்வந்தர் ஹசன் அலி. பழனிச்சாமிக்கு பணபலமில்லாவிட்டாலும்., தொகுதியில் நல்ல மனிதர் எனப் பெயரெடுத்தவர். எளிமையான மீனவ மக்கள் நிறைந்த தொகுதி என்பதால் மக்கள் பிரச்சனை புரிந்தவர். 2001 ஆம் ஆண்டுத் தேர்தலில் மதிமுக தனித்து நின்று பாட்ரிக் பெற்ற வக்குகள் 3399 வாக்குகள். அப்போது அன்வர் ராஜாவுக்கு கிடைத்த வாக்குகளும் கூட்டணி பலமாக இருந்ததால் கிடைத்தது. ஆனால் இப்போது?. கூட்டணி பலம், முகமதிய மக்கள் வாக்கு வங்கி எல்லாம் சேர்ந்து ஹசன் அலிக்குச் சாதகம்.

4.முதுகுளத்தூர்:
கே.முருகவேல்(திமுக) - (கூட்டணி பலம்+)
எஸ்.பி.காளிமுத்து(அதிமுக)
தனிக்கோடி (ஃபார்வார்டு ப்ளாக்)
சிவா(தேமுதிக)

முதுகுளத்தூரை முக்குலத்து மக்கள் 'அம்ம தொகுதிதேன்' அப்படின்னு தெளிவாகச் சொல்லிக் கொள்ளலாம் (தேர்தலில் வெற்றி பெறுவதற்கு மட்டும்!!). அடுத்ததாக யாதவ இன மக்கள். நாடார் இனம், தலித் மக்கள், முஸ்லீம் மக்களும் பெரும்பான்மையாக வசிக்கிறார்கள். இங்கு போட்டியிடும் திமுக, அதிமுக இரண்டு வேட்பாளர்களும் முக்குலத்தோர் சமூகத்தைச் சேர்ந்தவர்கள். போன முறை அதிமுக சார்பாக போட்டியிட்ட பதினெட்டடம் படியானுக்கு முயன்றும் இம்முறை சீட் கிடைக்கவில்லை. வேட்புமனு தாக்கல் செய்யவே ஊரைக் கூட்டி திருவிழா வச்ச காளிமுத்துக்கு பாதிக்கப்பட்ட அதிமுக பதினெட்டாம் படியானால் கலக்கமும் உள்ளது. தவிர, அதிமுக ஒன்றியச் செயளாலருடைய தம்பிதான் இம்முறை திமுகவில் நிற்கும் முருகவேல். யாதவ ஓட்டுக்களை முருகவேலுக்கு அள்ளி வர காங்கிரஸ் புள்ளி மலேஷ்யா பாண்டியன் ரெடி. முருகவேல் தொகுதி மக்களுக்கு புதிய முகம்தான் (காளிமுத்து தொகுதி மக்களுக்கு நன்கு அறிமுகமாவனவர்.) என்றாலும் அனைத்து சமூக பிரமுகர்களளயும் அரவணைத்து பிரச்சாரம் செய்கிறார். பத்தாததிற்கு ஃபார்வர்டு ப்ளாக்கும் அக்கட்சியில் முன்னால் எம்.எல்.எவைக் களமிறக்கி தேவர் நினைவிடத்தில் இருந்து பிரச்சாரத்தை ஆரம்பித்து இருக்கிறார்கள், முக்குலத்தோர் ஓட்டை அதிமுகவிலிருந்து பிரிக்க தனிக்கோடி தயார். தலித் மக்கள் ஒட்டைக்குறிவைத்து தேமுதிக களத்தில். முருகவேல் வெற்றிவேல் என்பதுதான் அங்கு நிலவரம்.

5. கடலாடி.
சுப.தங்கவேலன்(திமுக) - (சிறுபான்மையினர் வாக்கு வங்கி, கூட்டணி பலம் +)
வ.சத்தியமூர்த்தி (அதிமுக)

கீழக் கரை முஸ்லிம் மக்கள் கொத்தா ஒருத்தருக்கு ஓட்டுப்போட்டு வெல்ல வைக்கிற தொகுதி இது. காங்கிரஸ் சீனியர் தல சோ.பாலகிருஷ்ணன் போட்டியிட்டு தொகுதி, வென்ற தொகுதி இவரிடம் சொற்ப வித்தியாசத்தில் கடந்தமுறை தோற்றுப் போனவர் வேறயாருமில்லை. இப்ப காங்கிரஸ் ஆதரவோடு இத் தொகுதியில் நிற்கிறாரே திமுக மா.செ. சுப. தங்கவேலன் அவர்தான். கூட்டணி பலம் திமுகவிற்கு வெற்றிக் கனியை பறித்துத் தரும்.


இராமநாதபுரத்தில் மொத்தம் 5 தொகுதிகள். திமுக - 2, காங்கிரஸ் - 3

அதிமுக - 4, மதிமுக - 1 என களத்தில் இறங்கும் இங்கு, சாதி ஓட்டுகளும், கூட்டணி கட்சிகளின் பலமும்தான் வெற்றியை உறுதிசெய்யும். முதுகுளத்தூரில் யார் வெல்கிறார்களோ அவர் கட்சிதான் தென்மாவட்டங்கள் முழுவதும் பெரும்பான்மை பெரும் என்று சொல்லக் கேட்டிருக்கிறேன். பணபலமுள்ளவர்கள் இருந்தாலும் இது பெரும்பான்மையாக எளிய பொருளாதர பின்னனியைக் கொண்ட மக்கள் நிறைந்த தொகுதி. கடந்த முறை காங்கிரஸ்(த.மா.கா) 3 இடங்களிலும், அதிமுக 2 இடங்களையும் இங்கு கைப்பற்றின. இம்முறை முஸ்லீம் மக்கள் நிறைந்த கடலாடி தொகுதியில், சிறுபான்மையினருக்கு தனியான இட ஒதுக்கீடு ஏற்படுத்துவதற்கு சட்டம் திருத்தம் கொண்டு வர மத்திய அரசிடம் கோரியிருந்தது நிறைவேற்றப்படும் எனவும், அதற்கான சட்டம் தமிழகத்தில் கொண்டுவரப்படும், என்றும் சொல்லி வாக்கு கேட்கிறது திமுக, இது எடுபடும். மீனவர்கள் நிறைந்த இராமநாதபுரம் தொகுதி இலங்கை கடற் படையினாரால் இவர்கள் அல்லலுக்கு உள்ளாகுவதை எக்கட்சி நிறுத்துமோ, அவர்களுக்கு வாக்களிப்பார். மீன்பிடி தொழில் சிறக்க மீன்பிடி துறைமுகங்களும் இவர்களது தேவை.
இம்மாவட்டம் முழுவது நிறைந்துள்ளனர் பனைத் தொழிளாலர்களுக்கென பனைத் தொழிலாளர் வாரியம் அமைக்கப்படும் எனவும். நெசவாளர்களுக்கென கைத்தறி நெசவாளர் வாரியம் அமைக்கப்படும் எனவும் கூறி வாக்கு கேட்கிறது இரண்டு கூட்டணியும்.. மாவட்டத்தில் பெரும்பான்மையாக உள்ள சிறு விவசாயிகளுக்கு அதிமுக தேர்தல் அறிவிப்புக்கு முன்னர் சலுகைகள் அறிவித்தது. திமுகவில் தேர்தல் அறிக்கையிலும் ஒரு பக்கம் முழுவதும் விவசாயிகளுக்கான சலுகைகள்தான். எத்தனை, எத்தனை அறிவிப்புகள்? நல வாரியம்னா அது நமக்கு என்னா செய்யும்னுகூடத் தெரியாம இத்தனை சலுகைகளும் மழையாகத் தூறினால் பரவாயில்லை., சுனாமியாக மாறி சுருட்டிக்கொண்டாலும் 5 வருடங்களுக்கு ஒரு முறை மட்டுமே புன்னகை பூக்கும் அந்த ஞானிகளின் தீர்ப்பு யாருக்கு?., தெரிந்துவிடும் 8 ஆந் தேதி!! .

திமுக கூட்டணி - 5 இடங்கள்.
திமுக - 2 , காங்கிரஸ் - 3
வெல்லும் வாய்ப்புள்ளவர்கள் :
கே.முருகவேல்(திமுக)
சுப.தங்கவேலன்(திமுக)
கே.ஆர். ராமசாமி(காங்கிரஸ்)
கே.வி.ஆர்.ராம்பிரபு (காங்கிரஸ்)
ஹசன் அலி (காங்கிரஸ்)
இராமநாதபுரம் நண்பர்கள் கருத்துக்களைச் சொல்லுங்கள்.
கன்னியாகுமரி மாவட்ட கணிப்பு.
நெல்லை நிலவரம்.

தேர்தல் அலசல் - 2006 - தூத்துக்குடி




கைநிறைய முத்தென்று நினைத்தீர்களா?. ம்...! இதுவும் முத்துதான் கரிப்பில் நிதமும் வெந்து இதை அள்ளுபவர்களுக்கு. சரி யாருக்கு தூத்துகுடி?.

தூத்துக்குடி : மொத்த தொகுதிகள் எண்ணிக்கை 7

1.விளாத்திகுளம் 2. கோவில்பட்டி 3. ஒட்டப்பிடாரம் 4. தூத்துகுடி 5.திருவைகுண்டம் 6. திருச்செந்தூர் 7. சாத்தான்குளம்.

1.விளாத்திகுளம்:

சி.ராஜராம்(திமுக)

பி.சின்னப்பன்(அதிமுக)

சி.பாலகிருஷ்ணன் (தேமுதிக)

அதிமுக, திமுக மாறி, மாறி வெல்லும் தொகுதி. மதிமுக கணிசமாக வாக்குகள் பெற்ற தொகுதி. சிட்டிங் பெருமாளுக்கு பதில் சின்னப்பன் நிறுத்தப்பட்டிருக்கிறார். ஃபார்வர்டு ப்ளாக் வேட்பாளர் முருகேச பாண்டியன் அதிமுகவில் இணணந்தார். தேமுதிக பிரித்தாலும் அதிமுகவிற்கு இருக்கிறது வாய்ப்பு.

2. கோவில்பட்டி:

எஸ். ராஜேந்திரன் (சிபிஐ) - சிட்டிங் (கட்சி செல்வாக்கு, கூட்டணி பலம் +)

எல்.இராதா கிருஷ்ணன்(அதிமுக)

டி.சீனிவாசராகவன்(தேமுதிக)

பலமுறை இத்தொகுதியில் வென்றிருக்கிறது இந்திய கம்யூனிஸ்ட் கட்சி. தொழிற் சங்கங்களின் பலம், கூட்டணி பலம் என மிகத் தெம்போடு இருக்கிறது திமுக கூட்டணி. நாயக்கர் இன மக்களை நம்பி தான் நிறுத்தியிருக்கும் வேட்பாளர் ஓட்டுக்களை அதே இன வேட்பாளரை நிறுத்திருக்கும் தேமுதிகவும்,முக்குலத்தோர் வாக்குகளை ஃபார்வார்டு ப்ளாக்கும் பிரிக்கும் என்ற கவலையில் அதிமுக. ராஜேந்திரன் மீண்டும் அத்தொகுதி எம்.எல்.ஏ ஆகும் வாய்ப்பதிகம்.

3.ஓட்டப்பிடாரம்(தனி):

ராஜமன்னார்(திமுக)

மோகன்(அதிமுக)

டாக்டர். கிருஷ்ணசாமி (புதிய தமிழகம்) (தொகுதியில் செல்வாக்கு ++)

சிட்டிங் சிவ பெருமாளின் கோபம் மட்டுமல்ல மோகனுக்கு சருக்கல்., முன்பு அதிமுகவில் இருந்த ராஜமன்னார் இப்போது திமுகவில் நிற்கிறார், அதிமுக நண்பர்கள் இன்றும் அவருக்கு ஆதரவு தருகிறார்கள். ஜான் பாண்டியன் ஆட்கள் திமுகவிற்கு ஆதரவாக பிரச்சாரம் செய்கிறார்கள். புதிய தமிழகம் கட்சிக்கும் திமுகவிற்கும்தான் இங்கு போட்டியே. மாஞ்சோலையை மக்கள் எளிதில் மறக்கமாட்டார்கள் எனவே புதிய தமிழகத்திற்கு ஆதரவு நிச்சயம்.

4.தூத்துகுடி:

கீதா ஜீவன்(திமுக) - (கூட்டணி பலமும், பிரச்சாரமும் +)

டேனியல் ராஜ் (அதிமுக)

கடந்த முறை இங்கு அதிமுக வென்றது. 'கழகத்தூணின்' (பெரியசாமி) கோட்டை. 5ஆம் தேதி சோனியா தூத்துக்குடிக்கு வருகை தந்து நெல்லை, தூத்துக்குடி, கன்னியாகுமரியில் போட்டியிடும் காங்கிரஸ் மற்றும் அதன் கூட்டணி கட்சிகளுக்கு ஆதரவாக பிரச்சாரம் செய்வார். தூத்துக்குடி துறைமுக விரிவாக்கம், சேது சமுத்திர திட்டங்களால் நெல்லை, குமரி, தூத்துக்குடி மாவட்டங்கள் பயனடையப் போகின்றது என்ற பிரச்சாரம் எடுபடும். பல வேட்பாளர்கள் ஓடி அனிதா இராதாகிருஷ்ணனிடத்தில் அடைக்கலம் ஆகிக் கொண்டிருக்கும், அது பெரிதாக விளம்பரப்படுத்தபடும் இந்த நேரத்தில் சோனியாவின் வருகை திமுகவிற்கும் தோழமை கட்சிகளுக்கும் எழுச்சிதரும். திமுக மாவட்ட செயலாளர் பெரியசாமி, நெல்லை எம்.பி தனுஷ்கோடி ஆதித்தன் (இவர் நெல்லையில் கலகம் செய்தாலும்) கீதாவிற்கு உறுதுணையாக இருக்கிறார்கள். இத்தொகுதியில் கூட்டணி பலமும், பிரச்சாரமும் திமுக விற்கு சாதகம் செய்யும்.

5.திரு வைகுண்டம்:

செல்வராஜ்(காங்கிரஸ்) - (கூட்டணி பலமும், பிரச்சாரமும் +)

சண்முகநாதன் (அதிமுக)- சிட்டிங்

ஊர் முழுதும் போஸ்டர் ஒட்டி, வீடு வீடாகச் சென்று ஓட்டு சேகரித்த முன்பு அறிவிக்கப்பட்ட காங்கிரஸ் விஜயசீலன் மாற்றப்பட்டு தனுஷ்கோடியின் செல்வாக்கால் செல்வராஜ் நிறுத்தப்பட்டார். அதனால் காங்கிரஸ், கூட்டணி கட்சிகள் குழப்பத்தில். கடந்த தேர்தலில் திமுக நின்றது., எதிர்த்து அதிமுக வென்றிருந்தாலும், எப்போதும் திமுகவும், காங்கிரஸ் பலமாக உள்ள தொகுதி. கூட்டணி பலத்தையும், சோனியா பிரச்சாரத்தையும் கணக்கில் கொண்டால் காங்கிரஸ்க்கு வாய்ப்பிருக்கிறது.

6.திருச்செந்தூர்:

ஜெயசீலன்(திமுக)

அனிதா ராதாகிருஷ்ணன்(அதிமுக)- அமைச்சர் (வீட்டு வசதி, நகர்புற வளர்ச்சி) - (பணபலம் +)

ஜெயசீலன்

திருச்செந்தூரில் அமைச்சர் அனிதா இராதாகிருஷ்ணனை எதிர்த்து திமுக ஜெயசீலன் போட்டியிடுகிறார். இத்தொகுதியில் இருமுறை ஜெனிபர் சந்திரன் திமுக சார்பில் போட்டியிட்டார். திமுக வேட்பாளர் ஜெயசீலனுக்கு எம்.பி. ராதிகா செல்வி துணை நிற்கிறார். தான்னை போல் ஜெயசீலனையும் நாடார் கிராமமான அடைக்காலபுரத்தில் வேட்பு மனு தக்கல் செய்ய வைத்தார். மணப்பாடு காங்கிரஸ் பிரமுகர் கயஸின் தம்பி அதிமுக பஞ்சாயத்து தலைவர், மைக்கேல் திமுகவில் இணைந்தார். மீனவ சமுதாய ஓட்டுக்கள் , நாடார் ஓட்டுக்களே இத் தொகுதியில் பெரும்பான்மையானவை. கடந்த முறை இது இரண்டும் கிடைத்தது அனிதா இராமச்சந்திரனுக்கு. ஆனால் இம்முறை நாடார் வாக்குகள் விழாது. வெங்கடேசப் பண்ணையாரின் தம்பி சுபாஸ் பண்ணையாரும் திமுகவை ஆதரிக்கிறார். இவையெல்லாம் முன்னால் எம்.பியும் இந்நாள் வேட்பாளருமான ஜெயசீலனுக்கு சாதகம்தான். ஆனால் சிறுபான்மை சமூகத்தின் ஓட்டுக்கள் மொத்தமாக யாருக்கு விழும் என்பதிலும் இருக்கிறது இத் தொகுதியின் வெற்றி, தோல்வி. இத்தொகுதியில் போட்டியிட்ட ஃபார்வர்டு பிளாக் வேட்பாளர் நல்லூர் பரிசமுத்து நேற்று அதிமுகவில் இணைந்து விட்டார். பகுஜன் சமாஜ் கட்சி சார்பில் போட்டியிட்ட குமார் என்பவரும் அனிதா முன்னிலையில் அதிமுகவில் இணைந்துவிட்டார். நல்லூர்காரர் அதிமுகவில் இணைந்ததற்கு காரணம்தான் ஹலைட் முக்குல சமுதாய நலன் காக்கவாம் . அதிமுகவிற்கு/அனிதாவிற்கு வாய்ப்புள்ள தொகுதி.

7.சாத்தன்குளம்

ராணி வெங்கடேசன்(காங்கிரஸ்)

நாசரேத் துரை(மதிமுக)

காங்கிரஸ் வெல்லும் தொகுதி. காங்கிரஸ் வேட்பாளர் பட்டியலில் பாதிக்கும் மேற்பட்டவர்கள் மத்திய அமைச்சர் ஜி.கே. வாசனின் ஆதரவாளர்கள்தான். ஆனால் ராணி வெங்கடேசன் இளங்கோவன் ஆதரவாளர். ராணிவெங்கடேசனை ஆதரித்து கடுமையான வெயிலிலும் பிரச்சாரம் செய்தார் வாசன். வைகோ இரண்டாம் கட்டமாக தூத்துக்குடி சென்றபோது நாசரேத்க்காக பிரச்சாரம் செய்தார். நாசரேத்தும் சாத்தான்குளத்தில் மருத்துவ கல்லூரி அமைப்பேன் எனக்கூறி வாக்கு சேகரித்து வருகிறார். இருந்தாலும் இது ஏற்கனவே காங்கிரஸின் பலமான தொகுதி, கூட்டணி பலமும் சேர்ந்துள்ளது ராணி வெங்கடேசன் நிம்மதியாக இருக்கலாம்.

மொத்தம் 7 இடங்கள். திமுக - 4 காங்கிரஸ் -2 சிபிஐ - 1 எதிர்முகாமில் அதிமுக - 6 மதிமுக - 1 என இறங்கியிருக்கின்றன கட்சிகள். தூத்துக்குடி மாவட்டத்தில் இன ஒட்டுக்களை நம்பி இறங்கியிருக்கின்றன கழகங்கள். திமுகவிற்கு ராதிகா செல்வியும், அதிமுகவிற்கு சரத்தும் என நாடார் சமூக மக்களை வளைக்க இரு கழகங்கலும் போட்டியிடுகின்றன. இத்தேர்தல் வெற்றியில்தான் சரத்குமார் தனக்கு 'சாதி' செல்வாக்கு இருப்பதாக கூறிக் கொள்வதற்கு விடை தெரியும். இவர்கள் தவிர வாசன், வைகோ, கலைஞர், சோனியா (5 ஆம் தேதி) போன்றோரின் பிரச்சாரத்தின் பலனும் தேர்தல் முடிவுகளில் எதிரொளிக்கும். பார்வர்டு பிளாக் வேட்பாளர்கள் தாவிக் கொண்டிருப்பதும் முடிவுகளை பாதிக்கும். 800 கோடி செலவில் துவங்கப்பட்ட தூத்துக்குடி துறைமுக விரிவாக்கத் திட்டம், சேது சமுத்திரத்திட்டம் போன்றவைகளை மக்கள் சாதியை தள்ளி வைத்து நினைத்துப் பார்த்தால் அத் திட்டங்கள் வர வழி செய்த திமுக, காங்கிரஸ் போன்றவை ( சேது சமுத்திரத்துல மதிமுகவுக்கும் பங்கிருக்கிருக்குது) நல்ல தேர்தல் முடிவுகள் காணும். தேயிலை விவசாய்களின் உற்பத்திக்கு உரிய விலை கிடைக்க மத்திய அரசை வலியுறுத்துவோம், மீன்பிடித் துறைமுகங்கள் அமைப்போம், தூத்துக்குடிக்கு மருத்துவ கல்லூரி கொண்டு வருவோம் என்ற வாக்குறுதிகளும் தூத்துக்குடி மக்கள் மே 8 ஆம் தேதி போடும் 8 ல் எதிரொலிக்கும்.

வெல்லும் வாய்ப்பு,

திமுக கூட்டணி - 4 திமுக - 1, காங்கிரஸ் - 2, சிபிஐ - 1.

அதிமுக கூட்டணி - 2

புதிய தமிழகம் - 1. என்ற நிலையில் உள்ளது.

வெல்லும் வாய்ப்புள்ளவர்கள்.,

கீதா ஜீவன்(திமுக)

விஜயசீலன்(காங்கிரஸ்)

ராணி வெங்கடேசன்(காங்கிரஸ்)

எஸ். ராஜேந்திரன் (சிபிஐ)

பி.சின்னப்பன்(அதிமுக)

அனிதா ராதாகிருஷ்ணன்(அதிமுக)

டாக்டர். கிருஷ்ணசாமி (புதிய தமிழகம்)

தூத்துக்குடியைச் சேர்ந்தவர்கள் கருத்துக்கள் சொல்லுங்கள்.

கன்னியாகுமரி மாவட்ட கணிப்பு.

நெல்லை நிலவரம்.

தேர்தல் அலசல் - 2006 - திருநெல்வேலி


யாருக்கு இது?


திருநெல்வேலி : மொத்தம் 11 தொகுதிகள்.

1.வாசுதேவநல்லூர் 2.சங்கரன் கோவில் 3.தென்காசி 4.கடையநல்லூர் 5.ஆலங்குளம் 6. திருநெல்வேலி 7.அம்பாசமுத்திரம் 8. பாளை 9.நாங்குனேரி 10.சேரன்மாதேவி 11.ராதாபுரம்.


1.வாசுதேவநல்லூர் (தனி):
ஆர்.கிருஷ்ணன் (சிபிஐ(எம்)) (சிபிஐ (எம்) பலம், கூட்டாணி பலம் ++)
சதன். திருமலைக்குமார்(மதிமுக)
பாபு (ஃபார்வர்டு ப்ளாக்)
எஸ்.பிச்சை (தேமுதிக)

வாசுதேவ நல்லூர் தனித் தொகுதியில் கடந்தமுறை தமாகா வென்றது. 1997 ல் தொகுதியை கைப்பற்றிய ஆர்.கிருஷ்ணன் சிபிஐ(எம்) கடந்தமுறை போட்டிடவில்லை ஆனாலும் பல முறை இதே தொகுதியில் போட்டியிட்டு 2 முறை (1997- 1980) வென்று தொகுதி மக்களுக்கு நன்கு அறிமுகமானவர். காங்கிரஸ், கம்யூனிஸ்ட் கட்சிகள் பலமாக உள்ள தொகுதி. கடந்தமுறை புதிய தமிழகம் கட்சியும் கணிசமான வாக்குகளை பெற்றுள்ளது இங்கு. காங்கிரஸ் பிரமுகரான ஆர். ஈஸ்வரன் 6 முறை போட்டியிட்டு 5 முறை வென்ற தொகுதி வாசதேவநல்லூர். அவர் ஒரு முறை தோற்றதும் ஆர்.கிருஷ்ணனிடம்தான் :). மதிமுக சார்பில் கடந்த முறை கணேஷ் குமார் போட்டியிட்டு 13 ஆயிரம் ஒட்டுகளுக்கு மேல் பெற்றார். ஆனால் இம்முறை மதிமுக சார்பில் திருமலைகுமார் (இவர் கடந்த முறை சங்கரன் கோவிலில் நின்றார்) . நிறுத்தப்பட்டிருக்கிறார். ஃபார்வர்டு ப்ளாக்ம் களத்தில். சுயேட்சையாக ஒருவர் போட்டியிடுகிறார். அசைக்க முடியாத காங்கிரஸ் பலம், சிபிஐ(எம்) ன் சுயபலம், எல்லாம் சேர்த்து சிபிஐ(எம்)மை இங்கு சிரிக்க வைக்கும்.

2.சங்கரன் கோவில்(தனி):
ச. தங்கவேலு (திமுக) - (கூட்டணி பலம் +)
சொ.கருப்பசாமி (அதிமுக) - சிட்டிங் அமைச்சர் (ஆதி திராவிடர் நலத்துறை)
சுப்புலட்சுமி (ஃபார்வேர்டு ப்ளாக்)

அதிமுகவின் பலமுள்ள தொகுதி. அதிமுக கருப்பசாமி கடந்த இரு முறை தொடர்ந்து வென்றுள்ளார். இம்முறையும் போட்டியிடுகிறார். தேவர், ஆதிதிராவிட வாக்குகள் சம அளவிலும், அதற்கு அடுத்த நிலையில் நாயக்கர் இன மக்கள் வாக்கு வங்கியும் உள்ளது சங்கரன் கோவில். எனவே மதிமுக கணிசமாக வாக்குகள் பெறும் தொகுதியும் கூட. மதிமுகவின் செல்லத் தொகுதி. வைகோவின் சொந்த ஊரான கலிங்கப்பட்டியை கொண்ட தொகுதி. திமுகவுடன் பங்கீடு பேசும்போது (2001ல்) வைகோவால் விட்டுக்குடுக்க முடியாத இத் தொகுதியில் இம்முறை அதிமுக போட்டியிடுகிறது. 'பம்பரமாக' சுழன்று அதிமுகவிற்காக தீவீர பிரச்சாரம் செய்கிறார் வைகோ. கடந்தமுறை மதிமுக திருமலைக்குமார் (தற்பொது வாசுதேவ நல்லூரில் நிற்கிறார்). இத்தொகுதியில் போட்டியிட்டு 20,610 வாக்குகள் பெற்றார். இங்கு பலமுள்ள மற்றொரு கட்சியான புதிய தமிழகம் 42,738 வாக்குகள் பெற்றது. இல்லையெனில் இன்னும் அதிக வாக்குகளை மதிமுக பெற்றிருக்கும். ஃபார்வேர்டு ப்ளாக் சார்பில் அருந்ததியர் சமூகத்தைச் சேர்ந்த சுப்புலட்சுமி இத் தொகுதியில் போட்டியிடுகிறார். தேவரின கட்சியான ஃபார்வர்டு ப்ளாக் சுப்புலட்சுமி மூலம் ஆதிதிராவிடர் வாக்குகளையும் அள்ளகூடும், தேவரின வாக்குகளையும் பெறக்கூடும். பகுஜன் சமாஜ் கட்சி, சமாஜ்வாதி கட்சி ஆகியவையும், ஒரு சுயேட்சை வேட்பாளரும் களத்தில் உள்ளனர். தேவர் பெல்ட் கிராமங்களில் பெரும்பான்மையான வாக்குகள் அதிமுகவிற்கு முன்பு கிடைத்தது இப்போது நன்றாக சிதறும். கருப்பசாமி இருமுறை வென்றது, மதிமுகவின் பலம் இரண்டையும் கணக்கிட்டால் கருப்பசாமிக்குதான் இந்தக் கெடா என்று சொல்லத்தோன்றினாலும். அமைச்சரின் சமூகமே அவருக்கு எதிராக இருப்பதும், தொகுதியில் அவர் மீது நிலவும் அதிருப்தியும் திமுக தங்கவேலுக்கே வெற்றியென காட்டுகிறது.

3.தென்காசி:
வீ. கருப்பசாமி பாண்டியன் (திமுக) (கூட்டணி பலம் +)
இராம உதய சூரியன் (மதிமுக)

முத்துராஜா (ஃபார்வர்டு ப்ளாக்)
கே.ஆர்.எச்.காமராஜ் (தேமுதிக)

போன முறை அதிமுக வென்ற தொகுதி. மதிமுக கணிசமாக கூட வாக்குகள் பெறாத தொகுதி. துணிஞ்சு ஜெயலலிதா மதிமுகவிற்கு கொடுத்துருக்காங்க. இல்ல முடிவு தெரிந்து குடுத்தாங்களோ?. திமுக சார்பில் போன முறை நின்ற கருப்பசாமி பாண்டியனே இம்முறையும் நிற்கிறார். காங்கிரஸ் பலமாக உள்ள தொகுதி தென்காசி. தென்காசி தொகுதியின் சிறுபான்மை மக்களின் வாக்கு வங்கி திமுகவிற்கு சாதகம் செய்யும். தென்காசி-செங்கோட்டை மக்களின் கனவு ஒருங்கிணைந்த ஜவுளிகள் பூங்கா. அதை அதிமுக செய்யவில்லை. கூட்டணி பலம், தலையின் பழைய செல்வாக்கு (அதிமுகவில் அவர் இருந்தபோது) எல்லாம் சேர்த்து கருப்பசாமி பாண்டியனை காப்பாற்றும்.

4.கடையநல்லூர்:
எஸ். பீட்டர் அல்போன்ஸ் (காங்கிரஸ்)
யு.ஹச். கமாலுதீன்(அதிமுக) (காங்கிரஸ் கோஷ்டி அரசியல் +)
ம. கணபதி இராமசுப்ரமணியம் (தேமுதிக)

அதிமுக கடந்த முறை வென்ற தொகுதி. ஆனால் சிட்டிங்குக்கு இந்தமுறை சீட்டில்ல. இரு கட்சிகளும் மாறி, மாறி வென்ற தொகுதி. மதிமுகவும் சொற்ப வாக்குகள் பெற்ற தொகுதி. முக்குலத்தோர் வாக்கு வங்கி கடையநல்லுர். காங்கிரஸ் சார்பில் 'சீனியர் தல' பிட்டர் அல்போன்ஸ் களமிறங்குகிறார். ஆனால் அவரது தொகுதி ஈடுபாட்டில் மெய் மறந்த (5 வருடமா பீட்டர் தொகுதி பக்கமே வந்ததில்லையாம்) காங்கிரஸின் முக்கியத் தலைகளே போட்டிக் கூட்டம் நடத்தி அவரை ஆதரிக்கக் கூடாது என அறிவித்தனர். அது மட்டும்மல்லாமல் பி.ஹெச். பாண்டியனின் சகோதரர் சாமுவேல் பாண்டியன், தொகுதி மக்கள் நன்கறிந்த காங்கிரஸ் பிரமுகர் என்பதால் அவரை சுயேட்சையாக களமிறக்குகின்றனர். காங்கிரஸ் ஓட்டுக்கள் பிரியும். பகுஜன் சமாஜ் கட்சி யும், பாஜகவும் வேட்பாளர்களை நிறுத்தியுள்ளது. சிறுபான்மையினர் ஓட்டு பீட்டருக்கு சாதகமாகவே இருக்கும். கமாலுதீன் முஸ்லிம் என்றாலும், முஸ்லீம் ஓட்டுகள் அதிமுகவிற்கு சாதகமாக இருக்காது. கூட்டணியை வைத்துப் பார்த்தால் பீட்டர் சிரிக்கலாம். கட்சி செல்வாக்கை வைத்துப்பார்த்தால் கமாலுதீன் சிரிக்கலாம்.

5.ஆலங்குளம்:
பூங்கோதை ஆலடி ஆருணா (திமுக) (அனுதாபம், கூட்டணி பலம் +)
எம். பாண்டியராஜன்(அதிமுக)
கே.முத்துக்குமாரசாமி(தேமுதிக)

அதிமுக கடந்த முறை வென்ற தொகுதி. சிட்டிங் பி.ஜி இராஜேந்தரனுக்கு இம்முறை சீட்டில்ல. திமுக சார்பில் ஆலடி அருணாவின் மகள் பூங்கோதை நிற்கிறார். அவருக்கு பிரச்சாரம் செய்ய ராதிகா செல்வியை சமயம் பார்த்து அனுப்பியிருக்கிறது திமுக. தன் கணவர், பூங்கோதையின் அப்பா ஆலடி அருணா இருவரும் கொலைசெய்யப் பட்டது இந்த ஆட்சியில்தான். தமிழகமே கொலைக்களமாக மாறிவிட்டதென பிரச்சாரம் செய்கிறார் ராதிகா செல்வி. நாடார் மற்றும் தேவர் சமுதாய ஓட்டுக்கள் வெற்றியை நிர்ணயிக்கும். மதிமுக கொஞ்சம் அள்ளிய தொகுதிதான் ஆனாலும் தேமுதிக ஓட்டுகளை இப்போது பிரிக்கலாம். எல்லாத்துக்கும் மேல அனுதாபம் பூங்கோதை அவர்களுக்கு வாய்ப்பை நல்கும்.


6.திருநெல்வேலி:
என்.மாலைராஜா (திமுக)
நாயினார் நாகேந்திரன் (அதிமுக)- சிட்டிங். அமைச்சர் - தொழிலு! (தொழில்துறை)
(அமைச்சர், மக்கள் அறிந்த முகம் ++)
கிருஷ்ணகுமார் (தேமுதிக)
நாயினார் நாகேந்திரன்
மாவட்டத் தலைநகர் திருநெல்வேலி மாறி, மாறி கழகங்கள் ஆள வழிசெய்த தொகுதி. அமைச்சர் தொகுதி. கடந்தமுறை மிகக் குறைந்த வாக்கு வித்தியாசத்தில் திமுக ஏ.எல்.சுப்பரமணியத்தை வென்றார் அதிமுக அமைச்சர் நாயினார் நாகேந்திரன். பிள்ளைமார், யாதவ ஓட்டுக்கள் அதிகம் கொண்ட தொகுதி. திமுக சார்பில் புதுமுகம் மாலைராஜா போட்டியிடப் போகிறார். மாலைராஜா புதுமுகமென்றாலும் தேவரினத்தைச் சேர்ந்தவர். அதிமுகவில் இணைந்த சரவணபெருமாளை ஓரங்கட்டி வைத்ததால் இம்முறை பிள்ளைமார் ஓட்டுகளும் அப்படியே நாயினாருக்கு கிடைக்கும் என்று சொல்லமுடியாது. அடுத்து யாதவ மக்களின் ஓட்டுக்களை குறி வைத்து யாதவ பிரமுகர்கள் இவருக்காக யாதவ கிராமங்களில் வாக்கு சேகரித்து வருகின்றனர். எனினும் யாதவ ஓட்டுக்கள் 'இந்திய நீதிக் கட்சி' சார்பில் நிற்கும் யாதவ இனத்தை சேர்ந்த இன்பராஜ் (இக்கட்சியின் மாநில அமைப்பாளர் கிருஷ்ணகாந்தும் யாதவ இனம்தான்) கிடக்கவே வாய்ப்பதிகம். பத்தாததிற்கு யாதவ மக்களை தன்வசம் கொண்ட மக்கள் தமிழ் தேசம் கட்சியை துமுகவுடன் இணைதுள்ளார் ராஜ கண்ணப்பன். அடுத்து மிச்சமிருப்பது தலித் மக்களின் ஓட்டுக்கள் ஆனால் அவைகளை அப்படியே அள்ளிக் கொண்டு திமுகவில் போய் சேர்ந்துவிட்டார் முன்னால் அதிமுக எம்.எல்.ஏ. கோபால கிருஷ்ணன். இப்படி பல பக்கம் இடிதாங்கினாலும் நாயினார் முதல்வர், சரத்குமார் மற்றும் பல நடிகர்கள் துணையுடன் வாக்கு சேகரிக்கிறார். தொழிற்துரை அமைச்சராக 4 வருடம் இருந்த இவர் நாங்குனேரி தொழிற்நுட்பப் பூங்கா, ஒருங்கிணைந்த ஜவுளிகள் பூங்காக்கள் நெல்லை மாவட்டதிற்கு வர முயன்றிருந்தாலே போதும். இவ்வளவு சிரமம் இப்போது படத் தேவையிருந்திருக்காது. இதையெல்லாம் செய்யாததோடு, இருந்த பேட்டை கூட்டுறவு நூற்பாலைக்கும் பெரிய திண்டுக்கல் பூட்டு வாங்கிப் போட்டது மிகப் பெரிய மைனஸ் இவருக்கு. அந்தப் பூட்டை நான் திறப்பேன் எனக் கூறியே பிரகாசமான வரவேற்பு பெற்று வருகிறார் திமுக மாலைராஜா. இருந்தாலும் பண புலக்கம் அதிகமுள்ள தொகுதியென பயந்து, திமுக தலைகள் கலைஞரிலிருந்து, ஸ்டாலின், தயாநிதிமாறன் போன்றோர் பிரச்சாரம் செய்தனர். இவர்களுடன் கூட்டணித் தலைகள் வாசன், ஆர்.எம்.வீ ஆகியோரும் பிரச்சாரத்தில் குதிப்பர். தேவரின ஓட்டுக்களை ஃபார்வர்டு நம்பிராஜன் அதிகம் பிரிக்க வாய்ப்பில்லை. இவர்களுடன் பகுஜன் சமாஜ் கட்சி சார்பில் ஜெயக்குமார், சமாஜ் வாடி சார்பில் செல்லத்துரை மா. கம்யூனிஸ்ட் (என்.எஸ்) சார்பில் ராஜமாணிக்கம் மற்றும் மூவர் சுயேட்சையாகவும் போட்டியிடுகின்றனர். கடுமையான போட்டி இல்லாமல் இருந்தும் போனமுறை வெறும் 722 வாக்கு வித்தியாசத்தில்தான் வென்றார் நாயினார். இம்முறை வி.ப தண்ணீராய் இரைப்பதால் நாயினாருக்கு மீண்டும் சொற்ப வித்தியாசத்தில் நலம் தரலாம் நெல்லை.


7.அம்பாசமுத்திரம்:
இரா. ஆவுடையப்பன்(திமுக) - (கூட்டணி பலம் +)
ஆர். முருகையா பாண்டியன்(அதிமுக)
அந்தோணிராஜ் (ஃபார்வர்டு ப்ளாக்)
எஸ். சையத் அலிபாத் (தேமுதிக)

சிட்டிங் சக்திவேல் முருகன் வீட்டில். ஆனால் முருகையா பாண்டியன் மூன்பே 3 முறை இதே தொகுதியில் நின்று ஒரு முறை வென்றவரும் கூட. அப்படிப் பார்த்தால் போனமுறை சக்திவேலுக்குத்தான் வாய்ப்பு திடீரென கிடைத்திருக்கிறது. முக்குலத்தோர் பெரும்பபன்மையாக வசிக்கும் தொகுதி. திமுகவை எடுத்துக் கொண்டால் கடந்தமுறையும் இதே தொகுதியில் போட்டியிட்டு 300 ஓட்டு வித்தியாசத்தில்தான் ஆவுடையப்பன் பிந்தங்கியிருக்கிறார். பகுஜன் சமாஜ் கட்சி, ஜனதா தள், ஃபார்வார்டு ப்ளாக், தேமுதிக, சுயேட்சை வேட்பாளர்களும் களமிறங்குகிறார்கள். அதிமுக ஓட்டுக்கள் பிரியும் வாய்ப்புகள் அதிகம். கூட்டணி பலத்தில் ஆவுடையப்பன் ஆளுடையப்பனாக அதிக வாய்ப்புள்ளது.

8. பாளையங்கோட்டை:
மைதீன்கான் (திமுக) - (கூட்டணி பலம் +)
நிஜாமுதின் (இதேலீக்)
கே.ஏ.கலீல் ரகுமான் (தேமுதிக)
பாலு (ஃபார்வர்டு ப்ளாக்)

முஸ்லிம்கள் செல்வாக்குள்ள தொகுதி., எல்லாக் கட்சியும் விவரமா முஸ்லீம் வேட்பாளர்களை இறக்கியுள்ளன. தான் வென்ற தொகுதியை கூட்டணிக்கு கொடுத்திருக்கிறது அதிமுக. பாஜக, பகுஜன் சமாஜ் கட்சி, ராஷ்ட்ரிய லோக் தள் மற்றும் பல சுயேட்சை வேட்பாளர்களும் களமிறங்குகின்றனர். சொற்ப வித்தியாசத்தில் கடந்த முறை கோட்டை விட்ட திமுக மைதீன்கான் இம்முறை பிடிக்கலாம்.


9.நாங்குநேரி:
வசந்தகுமார் (காங்கிரஸ்) - (கூட்டணி பலம் +)
சூரியகுமார் (அதிமுக)
சங்கர் (ஃபார்வர்டு ப்ளாக்)

சட்டென கணிக்க முடியாத ஒரு தொகுதி. அதிமுக கடந்த முறை வென்றிருந்தாலும், மதிமுக மிகச் சொற்ப ஓட்டுகளே பெற்றது. சிட்டிங் மாணிக்கராஜ் ஏமாந்தது, தேவரின மக்கள் அதிகம் உள்ள தொகுதியில் ஃபார்வர்டு ப்ளாக் போட்டியிடுவது, பத்தாததிற்கு தேமுதிகவும் அதிமுக ஓட்டைப் பிரிக்க காத்திருக்கிறார்கள். வசந்தகுமார் நாங்குனேரிக்கு ஹைடெக் பார்க், வாழைக்காய் பதப்படுத்தும் தொழிற்சாலை கொண்டு வருவேன் என வாக்குறுதிகளை கொடுத்து ஓட்டுக் கேட்கிறார் வசந்தகுமார். பாரம்பரியமான காங்கிரஸ் குடும்பத்தைச் சேர்ந்தவர், வசதி படைத்தவராயினும் எளிமையாக மக்களுடன் பழகும் இயல்புடையவர் நாங்குனேரி, சூரியகுமார்க்கு சுழி, இங்கு வசந்தகுமருக்கு வீசலாம் வசந்தம்.


10.சேரன்மாதேவி:
பி.வேல்துறை (காங்கிரஸ்) - (கூட்டணி பலம் +)
பி.எச்.மனோஜ் பாண்டியன் (அதிமுக) - சிட்டிங்.
ஆறுமுக நாயினார் (பாஜக)
ராஜேந்திரபிரசாத்(தெமுதிக)

1996 ல் வென்ற வேல்துறை இம்முறையும் நிற்கிறார். கடந்த முறை வென்ற மனோஜ் பாண்டியனும்தான். பாஜகவும் கணிசமாக ஓட்டுக்கள் பெற்ற தொகுதி. குழப்பமிருந்தாலும். பிரச்சார வேகமும், கூட்டணி பலமும் காங்கிரஸ்க்கே மாதேவியென காட்டுகிறது.

11.ராதாபுரம்:
எம். அப்பாவு (திமுக) - சிட்டிங் (தொகுதியில் செல்வாக்கு, கூட்டணி பலம் ++)
எல். ஞானபுனிதா (அதிமுக)
கேபிகே.செல்வராஜ் (சுயேட்சை)
எம். அப்பாவு

அப்பாவு அய்யா சுயேட்சையாவே நின்னு அள்ளி வென்ற தொகுதி. பாமக திமுகாவை விட போனமுறை 'அதிக' வாக்குகள் பெற்ற தொகுதி. திமுகவும் இருபதாயிரத்திற்கு மேல் போன முறை அள்ளிய தொகுதி. நாடார் இனத்தை சேர்ந்த காங்கிரஸ் செல்வராஜ் சுயேட்சியாக களமிறங்கி இருக்கிறார் (காங்கிரச் எம்.பி தனுஷ்கோடி ஆதித்தனின் ஆதரவில்). கூட்டணியில் இருக்கும் காங்கிரஸ் எம்.பியே இப்படிச் செய்யலலமா என காதில் கனல் கக்குகின்றன உடன்பிறப்புகள், இருந்தாலும் சில மாதங்களுக்கு முன் திமுகவில் இணைந்து 'சீட்' டை கைப்பற்றிய அப்பாவுவைப் பார்த்தாலும் புகைவிடுகிறன. திமுக கூட்டணிக்கு வரும் நாடார் ஒட்டைப் பிரிப்பதற்காக செல்வராஜ் களமிறங்கி இருந்தாலும்., கரன்சியை வாரியிரைக்கும் சுயேட்சை செல்வராஜ் கண்டு கலங்கிப் போயிருக்கிறரது அதிமுக தரப்பும். செல்வராஜ் அதிமுகவின் 'நாடார்' இன ஓட்டையும் பிரிப்பாரில்ல?. அப்பாவு தொடர்ந்து கடந்த இருமுறை வென்ற தொகுதி, (1996ல் தமாகா சார்பாக நின்று வென்றிருக்கிறார்., எனவே காங்கிரஸ் ஓட்டை பிரித்தாலும் அவ்வளவு பாதிப்பிருக்காது). பாமக கணிசமாக செல்வாக்குப் பெற்றுள்ளது இங்கு (தெக்கப்பா...! கவனிங்க, அதிமுக உடனிருந்தது எனறாலும்). உறுதியாக இந்தத் தொகுதி திமுகவிற்கே என்பதென் அவதானம்.

மொத்தத் தொகுதிகள் - 11

திமுக - 7 , காங்கிரஸ் - 3, சிபிஎம் - 1

அதிமுக - 8, மதிமுக - 2, இதேலீக் - 1 எனப் போட்டியிடுகின்றன. பதினொன்று தொகுதிகளை தன்னில் கொண்ட திருநெல்வேலி மாவட்டம் மாறி, மாறி திராவிட கட்சிகளையே வெல்ல வைத்திருக்கிறது. போனமுறை அதிமுகவினருக்கு இம்மாவட்டத் தேர்தல் முடிவுகள் திருவிழாக் கொண்ட்டாட்டமாக அமைந்திருந்தது 11 தொகுதிகாளில் 10 தொகுதிகளை வென்றது அதிமுக. அப்போது அதிமுகவின் கூட்டணியில், திமுக கூட்டணியில் தற்போதுள்ள பெரிய கட்சிகள் எல்லாம் இருந்தது. எனவே கடந்த தேர்தலில் அதிமுகவிற்கு வந்த முடிவுகள் திமுகவிற்கு கிடைக்கும் இப்போது. மதிமுக கணிசமாக வாக்குகளைப் பெறக்கூடிய மாவட்டம் நெல்லை. ஆனால் 2 இடம்தான் மதிமுகவிற்கு தரப்பட்டுள்ளது. வைகோ சுறாவளியாக மாறி சுற்றியிருக்கிறார் இம்மாவட்டத்தை. நாடாளுமன்றத் தேர்தலில் திமுகவிற்கு உழைத்ததைப்போல். 'டாட்டாவ மிரட்டுனாங்க, அறிவாலயத்தை அடகு வச்சாங்கன்னு' இவர் போடும் குண்டுகளால் கலகலத்தது நெல்லை. ஜெயலலிதா, வைகோ பிரச்சாரம் பலம் தருமா? அதிமுக குறிப்பிடத்தக்க செல்வாக்கு, மதிமுகவிற்கு கணிசமான செல்வாக்கு, சிறுத்தைகளுக்கு பலமில்லா மாவட்டம்.
மொத்தமுள்ள 11 தொகுதிகளில் 10 தொகுதிகளில் போட்டியிடுகிறது முக்குலத்து ஃபார்வர்டு ப்ளாக். தனித் தொகுதி இரண்டிலும் ஃபார்வர்டு ப்ளாக் வேட்பாளர்களை நிறுத்தியுள்ளது. வேட்பாளர்களை முதலில் அறிவித்து, பின்பு அதை மாற்றி அறிவித்து என குழப்பத்தில் தவித்து ஒரு வழியாக 11 இடங்களிலும் தேமுதிக தனது வேட்பாளர்களை நிறுத்தியுள்ளது. தொழில் வளத்தில் பின் தங்கிய மாவட்டம் நெல்லை. நாங்குனேரி தொழிற் நுட்பப் பூங்கா, ஒரிங்கிணைந்த ஜவுளி பூங்கா போன்ற திட்டங்கள் இம் மாவட்டத்தின் தொழிற் வளத்தை உயர்த்தும். தொழிற்துறை அமைச்சரை இம்மாவட்டம் தன்னிடம் வைத்திருந்தும் இத்திட்டங்கள் நிறைவேற்றப் படவில்லை.
திமுக கூட்டணிக்கு 9 இடங்கள் கிடைக்கலாம். 2 இடங்களில் அதிமுக கட்சிகள் வெல்லலாம். கூட்டணி பலம் நிச்சயம் 9 இடங்கள் திமுக கூட்டணிக்குப் பெற்றுத் தருமென நம்பலாம்.

திமுக கூட்டணி - 9
அதிமுக கூட்டணி - 2
திமுக - 6 , காங்கிரஸ் - 2, சிபிஐ(எம்) - 1 வெல்லலாம்.
அதிமுக - 2 வெல்லலாம்.
வெல்வதற்கு வாய்ப்புள்ளவர்கள் :
ச. தங்கவேலு (திமுக)
வீ. கருப்பசாமி பாண்டியன் (திமுக)
பூங்கோதை ஆலடி ஆருணா (திமுக)
இரா. ஆவுடையப்பன்(திமுக)
மைதீன்கான் (திமுக)
எம். அப்பாவு (திமுக)
வசந்தகுமார் (காங்கிரஸ்)
பி.வேல்துறை (காங்கிரஸ்)
ஆர்.கிருஷ்ணன் (சிபிஐ(எம்))
யு.ஹச். கமாலுதீன்(அதிமுக)
நாயினார் நாகேந்திரன்(அதிமுக)

சரிதானா? திருநெல்வேலி மக்கள் கருத்துகளைச் சொல்லுங்க!!.
கன்னியாகுமரி மாவட்ட நிலவரம் பாருங்க.

தேர்தல் அலசல் - 2006 - கன்னியாகுமரி


தலைகள் செல்வாக்கு, கட்சி செல்வாக்கு, கரன்சி செல்வாக்கு என பல செல்வங்களை மேற்பூசி தேர்தலால் கலை கட்டியிருக்கிறது தமிழகம். எப்போது தண்ணீர் வரும், மின் கட்டண உயர்வு வரும், பயணக் கட்டணங்கள் திருத்தப்படும்., எப்போது மறியல், எப்போது வந்துகொண்டிருக்கும் வண்டியைத் திருப்பிக் கொண்டு வேறு சாலையில் பயணித்து நொந்து நூலாகிய பயணம் என்று ஒவ்வொரு நாளும் எதற்காவது விடை தேடிக் கொண்டிருக்கும் மக்கள் முகம் பார்த்து, ஒரே ஒரு நாள் தலைவர்களின் துடிப்பு. நம்ம 5 வருடம் அனுபவிப்பதை ஒரே நாளில் அனுபவிக்கும் துடிப்பு. மே 8 !! எத்தனை பேருக்கு மக்கள் 'டிக்' அடிக்கப் போறங்க., எத்தனை பேரை 'ஷாக்' குடுத்து வீட்டுக்கு அனுப்பப் போறாங்கன்னு ஒரு அலசு அலசலாம். பார்த்துவிட்டு உங்கள் தொகுதி பற்றிய சரியான கணிப்புதானா எனச் சொல்லுங்கள். இடையிடையே., படிக்க ஆர்வமாக இருக்கவேண்டும் என்பதால் கொஞ்சம் வார்த்தைகள் நம்ம ஸ்டைலில் இருக்கும் :).

மொத்தத் தொகுதிகள் : 234

திமுக கூட்டணி தொகுதிகள் :

திமுக : 129 இடங்கள்
காங்கிரஸ் : 48 இடங்கள்
பா.ம.க : 31 இடங்கள்
சி.பி.ஐ(எம்) : 13 இடங்கள்
சி.பி.ஐ : 10 இடங்கள்
முஸ்லிம் லீக் : 3 இடங்கள்

அதிமுக கூட்டணி தொகுதிகள் :

அதிமுக : 182 இடங்கள்
மதிமுக : 35 இடங்கள்
விசி : 9 இடங்கள்
ஐ.என்.டி.யூசி : 2 இடங்கள்
இந்திய தேசிய லீக் : 2 இடங்கள்
இந்திய யூனியன் முஸ்லிம் லீக் : 1 இடம்
மூவேந்தர் முன்னேற்ற கழகம் : 1 இடம்
அகில இந்திய ஃபார்வர்டு ப்ளாக் : 1 இடம்
மதச்சார்பற்ற ஜனதாதளம் :1 இடம்

மாவட்டவாரியான தொகுதி அலசல்

தெற்கிலிருந்துதான் இந்திய வரலாற்றையே ஆரம்பிக்க வேண்டும். ஆனால் இமயத்திலிருந்து தொடங்குகிறார்கள். தமிழக வரலாறும் அப்படித்தான். வட வேங்கடம் முதல் தென் குமரிவரை எனச் சொல்கிறார்கள். குமரியிலிருந்தல்லவா துவங்க வேண்டும்?. நம்மால் வரலாற்றை மாற்ற முடியுமா என்ன?. ஆனால் நம் அலசலை தெற்கிலிருந்து ஆரம்பிக்கலாம்.... தற்போதைய நிலவரப்படி வெல்லும் வாய்ப்புள்ளவர்கள் என என் அறிவுகெட்டியபடி கணக்கிட்டவர்களை சற்று அடர்த்தியாக (Bold) இங்கு காட்டியிருக்கிறேன். இரண்டு கூட்டணி கட்சிகள் நீங்கலாக உள்ள மற்ற தேமுதிக, ஃபார்வர்டு ப்ளாக், பாஜக போன்ற கட்சிகளால் மற்றும் சுயேட்சை வேட்பாளர்களால் சிறிதேனும் மாற்றம் (ஓட்டுகள் பிரியும் நிலை) இருக்கும் என கருதினால் மட்டுமே அவைகளை சேர்த்திருப்பேன்.
கன்னியாகுமரி:
அய்யன் ஆசி யாருக்கு?

கன்னியாகுமரி : மொத்தம் 7 தொகுதிகள்.

1. கிள்ளியூர் 2. திருவட்டார் 3. விளவன் கோடு 4. பத்மனாபபுரம் 5. குளச்சல் 6. நாகர்கோவில் 7. கன்னியாகுமரி.

1. கிள்ளியூர் :
ஜான் ஜேக்கப் (காங்கிரஸ்) (தன் கட்சி மற்றும் கூட்டணி ++)
டாக்டர் தே. குமாரதாஸ் (அதிமுக) - சிட்டிங் (த.மா.கா). (சிட்டிங், தொகுதியில் செல்வாக்கு +)
சந்திரக்குமார் (பாஜக)
குமாரதாஸ்

கடந்த இரு முறை த.மா.கா சார்பிலும் அதற்கு முன்பு ஒரு முறை ஜனதா தளம் சார்பிலும் நின்று வென்ற சித்த மருத்துவர் குமரதாஸ் இம்முறை அதிமுக சார்பில் போட்டியிருகிறார். தொடர்ந்து 3 முறை இவர் வென்றிருக்கிறார் ஆனால் அது ஒரு முறைகூட அதிமுக சார்பில் இல்லை. தமாக காங்கிரஸூடன் இணைந்ததால் அதிமுகவில் சேர்ந்த இவர் காங்கிரஸ் வேட்பாளராக நின்றிருந்தால் இம்முறையும் வெற்றி நிச்சயம்.
சிறப்பு சிற்றூராட்சியான கிள்ளியூர் காங்கிரஸ் பலமாக உள்ள தொகுதி என்பதனாலும், கூட்டணியாலும் ஜான் ஜேக்கபிற்கு அதிக வாய்ப்புள்ளது.


2. திருவட்டார் :
லீமா ரோஸ் (சிபிஐ (எம்) (கட்சியின் பலம் +)
திலக்குமார் (அதிமுக)
சுஜித் குமார் (பாஜக)

சிறப்பு சிற்றூராட்சியான திருவட்டாரில் கடந்த முறை சி.பி.எம் வென்றது. சி.பி.எம், திமுக, காங்கிரஸ் ஆகிய கட்சிகளே அடுத்தடுத்து இங்கு வென்றுள்ளது. அத்தனையும் கூட்டணி போட்டு நிற்கும் இம்முறை 'கனி' லீமா ரோஸ்க்கு (அவர் புதுமுகமாக இருந்தாலும்) கிடைக்கவே அதிக வாய்ப்புள்ளது.

3. விளவன் கோடு
ஜான் ஜோசப் (சிபிஐ(எம்)) (கட்சியின் பலம், கூட்டணி +)
ஃபிராங்கிளின் (அதிமுக)
தேவதாஸ்(பாஜக)

சிபிஎம் உறுதியாக வெல்லும் தொகுதி விளவன் கோடு. அதற்கடுத்த நிலையில் காங்கிரஸ். எனவே ஜான் ஜோசபிற்கு வெற்றி நிச்சயம். இவரும் முதன் முறை களம் காண்கிறார்.

4. பத்மனாபபுரம்:
தியோடர் ரெஜினால்டு (திமுக)
கே.பி.ராஜேந்திரபிரசாத் (அதிமுக) - சிட்டிங் (சிட்டிங் +)
வேலாயுதம் (பாஜக)

அதிமுக, பாஜக அடுத்தடுத்து வென்றுள்ள தொகுதி. எனவே இம்முறையும் வாய்ப்பிருக்கலாம். தொகுதியில் நல்ல பெயர் எடுத்திருக்கிறார். சிட்டிங் தொகுதிய செழிப்பா வச்சிருந்தா சான்ஸ் அவருக்கு அதிகம்.

5. குளச்சல்:
ஜெயபால் (காங்கிரஸ்)
பச்சைமால் (அதிமுக) - சிட்டிங்

கடந்த முறை அதிமுக. அதற்கு முன்பு திமுக, அதற்கு முன்பு காங்கிரஸ்னு குளச்சல் குழப்புது. இருந்தாலும் பச்சைமால் முன்பு வென்றபோது காங்கிரஸ் உடன் இருந்தது. கூட்டணியை கணக்கில் கொண்டு பார்த்தால்... காங்கிரஸ் மலர்ச்சியாகிக்கலாம்.

6. நாகர்கோவில்
ராஜன் (திமுக) (கூட்டணி +)
ரத்தினராஜ் (மதிமுக)
ஆஸ்டின் (சுயேட்சை) - சிட்டிங். ( சிட்டிங், செல்வாக்கு மற்றும் கிருத்துவ அமைப்புகளின் அதரவு + )


இத் தொகுதியிலும் கலந்துகட்டியே கட்சிகள் வென்று வந்துள்ளன. சிட்டிங் எம்.எல்.ஏ ஆஸ்டின் செல்வாக்கு பெற்ற தொகுதி. அவரும் கிருத்துவ அமைப்புகள் ஆதரவுடன் சுயேட்சையாக நிற்கிறார். கடந்த முறை எம்.ஜி.ஆர்.அதிமுக வேட்பாளராக களமிறங்கி (அதற்கு முன் அதிமுகவில் இருந்தார்) வென்று, பின்பு மீண்டும் அதிமுகவில் இணைந்த இவரால் ஓட்டுகள் கணிசமாகப் பிரியும். முன்பு இத் தொகுதியில் தனித்து நின்ற மதிமுக ரத்தினராஜ் அதிமுக துணையுடன் மீண்டும் இறங்குகிறார். தனித்து நின்று அவர் பெற்ற வாக்குகள் 13,531. ஆனால் இம்முறையும் அதிமுக தலைகள் எல்லாம் தளவாய்யை பூஸ்ட் பண்ண கன்னியாகுமரி போய்விட வாடித் தெரிகிறார். கூட்டணியை கணக்கில் கொண்டால் திமுகவிற்கு வாய்ப்புள்ளது.

7. கன்னியாகுமரி.
சுரேஷ் ராஜன் (திமுக)
தளவாய்சுந்தரம்(அதிமுக)-சிட்டிங்.(அமைச்சர் - சுகதாரம்)
தளவாய்சுந்தரம்

கடந்த முறை அதிமுக அதற்கு முன் திமுக மாறி, மாறி வென்று வருகிறது. அமைச்சர் தொகுதி. ஜெ, சரத்குமார், வைகோ பிரச்சார கலக்கலில் சற்று தெம்பாகத்தான் தெரிகிறார் தளவாய். சுரேஷ்ராஜனும் போன முறைக்கு முந்திய முறை வென்றவர்தான். கடந்த முறையும் திமுக சார்பாக தளவாய் சுந்தரத்தை எதிர்த்துதான் பொட்டியிட்டார். தளவாய்க்கு சரியான போட்டி. வாக்குறுதிகளை அள்ளி விசாமல் தளவாய் வலம் வர, இவர் ரப்பர் பூங்கா, நாங்குனேரி தொழிற் நுட்ப பூங்கா, புத்தேரி ரயில்வே மேம்பாலம் அனைத்தும் அமைப்போம் என உறுதி கூறி வாக்கு கேட்கிறார். மேடைகளில் ஒருவரை ஒருவர் விலாசிக் கொள்கின்றனர். ஒரே மேடையில் இருவரும் சந்தித்து வரலாறு காணத சாதனைகள் படைத்து கலை கட்டியிருக்கிறது மாவட்டத் தலைநகர் குமரி. கடும் போட்டி. ஆனாலும் கூட்டணி பலம் உண்டு திமுகவிற்கு.
கன்னியாகுமரியில் மொத்தமுள்ள 7 இடங்களில்.
திமுக - 3, காங்கிரஸ் - 2, சிபிஎம் - 2.
அதிமுக - 6, மதிமுக - 1. எனப் போட்டியிடுகின்றன. குமரி மாவட்டம் பொதுவாக தேசியக் கட்சிகளின் கூடாரம். கழகங்களின் தொல்லை. 'பெருந்தேசியம்' காங்கிரஸ் தற்போது கூட்டணியில். திமுக கூட்டணியுளுள்ள வேட்பாளர்கள் அதிகம் கிருத்துவ மதத்தவர்கள். (விவரமா நிறுத்தப்பட்டுள்ளனர்). எனவே எப்படி இருந்தாலும் 6 இடங்கள் திமுக கூட்டணிக்கு கிடைக்கலாம்.
திமுக கூட்டணி - 6
அதிமுக - 1

திமுக - 2 , காங்கிரஸ் - 2, சிபிஐ(எம்) - 2 வெல்லலாம்.
அதிமுக - 1 வெல்லலாம்.

வெல்வதற்கு வாய்ப்புள்ளவர்கள் :
ராஜன் (திமுக)
சுரேஷ் ராஜன் (திமுக)
ஜான் ஜேக்கப் (காங்கிரஸ்)
ஜெயபால் (காங்கிரஸ்)
லீமா ரோஸ் (சிபிஐ(எம்))
ஜான் ஜோசப் (சிபிஐ(எம்))
கே.பி.ராஜேந்திரபிரசாத் (அதிமுக)
கன்னியாகுமரி மக்கள் கருத்துகளைச் சொல்லுங்க.

Wednesday, April 26, 2006

மூன்று சிறிய ஓநாய்களும், பெரிய கெட்ட பன்றியும்.

நீங்கள் ஒன்றை அவதனித்து இருக்கிறீர்களா?. நம் குழந்தைகளுக்கு ஆயிரம் கதைகள் மனிதர்களைப் பற்றி சொன்னாலும் அவர்கள் பன்றிகளைப் பற்றியே அதிகம் தெரிந்துகொள்ள ஆசைப் படுகின்றனர். The Three Little Wolves And The Big Bad Pig என்றொரு கதை நாடகம் (பாட்டும் உண்டு) சிறு பிள்ளைகள் இரசித்துக் கேட்பார்கள். நீங்களும் படியுங்கள் இங்கு.



பன்றிகளால் மூளைக் காய்ச்சல் பரவும். சாதாரணமாக மிக சாதுவாகவே இருக்கும். அதனுடைய இடம் எதுவென புரியாமல் நாம் வெளியே சென்றால் வாலை ஆட்டி வாசம் தெளித்துப்போகும் இயல்பு கொண்டது. பாவமான பிராணி. அதுவும் வயதாகி விட்டதென்றால் மிகப் பாவம். இப்படித்தான் நாம் அறிந்திருக்கிறோம். அவைகளின் பல பரிமானங்கள் காட்டும் Old Pig என்ற மற்றொரு புத்தகமும் படிக்கச் சுவையானது. வேண்டுவோர் புத்தகங்களைப் பற்றி இங் கிங் கும் இங்கும் தெரிந்து கொள்ளலாம்.
பன்றிக்காகவெல்லாம் ஒரு பதிவான்னு கேட்கிறிங்களா?. அதுவும் சரிதான்.

கேளுங்கள்...


இயக்குனர் சீமன் அவர்களின் 'தென்னவன் கலை மன்றம்' நடத்திய தேர்தல் பிரச்சார கூட்டத்தில்., பேராசிரியர். சுப.வீ மற்றும் இயக்குனர் சீமன் அவர்கள் ஆற்றிய உரையின் ஒளிக் கோப்பு., இவ்வார நக்கீரன் (படத்திற்கு நன்றி) பத்திரிக்கை இணைய தளத்தில் வெளிவந்துள்ளது. உரையை அச்சில் பலர் பார்த்திருப்பீர்கள். நாட்டுல நடக்குற நாடகங்களையும்தான். ஊருக்கு ஒரு வேலையா தொலைபேசினா ஒருத்தரையும் புடிக்க முடியலை.. எல்லாரும் தான் "நிக்கிற" (தேர்தல்ல) மாதிரியே பரபரன்னு திறிஞ்சுகிட்டு இருக்காங்க... நம்ம பய ஒருத்தன் எப்பப்பாரு வெட்டியா உட்கார்ந்துகிட்டு இருப்பான்., நடுராத்திரி 3 மணிக்கு பேசினாக்கூட அப்பத்தான் வந்து கடற்கரையில படுத்துகிட்டு காத்துவாங்கிட்டு இருக்கறவன் மாதிரி மகா உற்சாகமா 'ஹலோ' ம்பான். அவன் எங்கேன்னு கேட்டா தொகுதி நிலவரத்தை தெரிஞ்சுக்க போயிருக்கானாய்ங்க... எனக்கு ஒரே கலவரமாத்தான் போச்சு... அவனுக்கு இன்னும் ஓட்டுப் போடற வயசே ஆகலியேன்னேன்... ம்... வயசானத்தான் ஓட்டுப் போடணுமா? இல்ல ஓட்டுப்போடாட்டி நிலவரத்தை தெரிஞ்சுக்க கூடாதா? ன்னு நல்லு நறுக்குனு வருது கேள்வி... நம்ம ஆளுகளுக்கு கேட்கவா சொல்லித்தரணும்?. ஆனா கேட்கவேண்டியதை கேட்கவே மாட்டாங்க:). மொத்தம் நிக்கறது பதினைஞ்சு பேரு (நாமினிகளோட சேர்த்து), பூராம் துவரங்குறிச்சி, பண்ணங்கொம்பு ஆளுகதான்., சால்மா(சல்மா)க்கா அருமையா பிரச்சாரம் பண்ணுராங்க., சால்மாக்கா கூட பிரச்சாரம் போகாம சொனங்ககுனதுனால செங்குட்டுவனையும், அவர் மகன் மா.செ வையும் ஸ்டாலின் தாளிச்சுட்டாரு பாவம்... போன முறைக்கு முந்துன முறை கம்பத்துல கொடி கட்டுர பிரச்சனையில காலு போன கனகராசு இப்ப நல்லா குதிச்சு., தன் காலக் காட்டி, காட்டியே எந்த எதிர்புமில்லாம ஊர் ஊரா கொடி கட்டுறார். டாக்சி ஸாண்ட்ல "அன்னைக்கு" ஆளுகள கூட்டிட்டு வர 'பிளசரை' களுவி அழகு படுத்தறாங்க... ஆட்களை ஆள்ளிக்கொண்டு வருகின்றன அரைப்பாடி லாரிகள்... 'பூத்' பக்கத்துல நிக்க "சூரியன்" சேலைய 'அயர்ண்' பண்ணிருச்சு அத்த... கருப்பு, வெள்ளை, சிவப்பு கரை வேட்டிய துவைக்கப் போட்டுட்டாரு மாமன்னு மக்கள் திருவிழா கொண்டாட ரெடியாய்ட்டாங்க... இவிங்களும் நம்மப் போலத்தான் வெடியா... வெகுளியான்னு பகுத்தறிய முடியாது... ஒரு வீட்டுல உள்ள ஆளுகளே 5 கட்சிக்கு பிரச்சாரம் பண்ணுவங்க... ஒருமுறை ஓட்டுப் போட்டு விட்டு வந்த பெரியம்மாவிடம் "யாருக்கு குத்துன?" ன்னு கேட்டப்ப., என் மகன் சூரியனுக்கு போடச் சொன்னான்., வீட்டுக்காரரு அதிமுகவுக்குப் போடச் சொன்னாரு, ஆதி காலத்துலயிருந்து எங்க மாமனாரு காங்கிரஸூ ...
அய்யய அந்தக் கதையெல்லாம் விடு... இப்ப யாருக்கு போட்ட? ன்னா அவங்க சொன்னாங்க பாருங்க பதில்
"வஞ்சகமில்லாம எல்லாத்துலயும்தான் குத்துனேன்!" னு. வஞ்சகமில்லாம செல்லாத ஓட்டப் போட்டு குடும்பம் முழுவதுக்கும் வஞ்சகம் செஞ்சிருச்சு பெரியம்மா...! முதல் நாள் ராத்திரி முழுவதும் கண்ணு முழிச்சு அவங்களுக்கு ஓட்டுப் போட சொல்லிக் குடுத்த கேசுக எல்லாம் அப்புறம் கூடி கும்மி கும்மியடிச்சாய்ங்க பெரியம்மாவ....
சரத்குமார் போனது...
இராஜேந்தர் வந்தது...
கார்த்திக் கொஞ்ச நேரம் காணமப் போனது... (ஒரு வேட்பாளரையும், ஒரு தொகுதியையும் பறி கொடுத்துட்டாராமே :(
விஜயகாந்த் பைபிள், குரான், கீதை தாறேன்னது...
வைகோ காற்றில் சொற்களை அலையவிட்டது...
அதை கையில் பிடித்து தயா தூக்கி ஏறிந்தது
கலைஞர் அப்படிச் சொன்னது, அம்மா இப்படிச் சொன்னது...
இதற்கிடையேயும் (இவ்வளவு காலம் தமிழக அரசியல் கண்டும்) " தோழர்கள்" தங்கள் பாரம்பரியம் மாறாமல் செஞ்சொற்கள் பேசிக்கொண்டிருப்பது...
இது மட்டுமா தேர்தல்? இவ்வளவையும் கேட்டு (பைத்தியம், கியித்தியம் புடிக்காம!!), 5 வருடத்திற்கொருமுறை கிடைக்கும் கவுரவத்தில்., ஒரு நாள் கூத்துக்கென்று தெரிந்தாலும் ., கலந்து கட்டுன உணர்வோட எங்க பொறோம்? என்னா செய்யிறோம்னு ஒண்ணும் புரியாமத் திறிஞ்சுகிட்டு இருக்கிற இந்த சக்தியைப் புறந்தள்ளியொரு தேர்தல் இல்லை. இச்சக்தியை ஒருங்கிணைக்க., உண்மைகளை உணர வைக்க., அன்றெலுந்த ஒரு எழுச்சி இன்று வீழ்ந்து எதிலும் சமரசமாகி., சமாதியாவதை சுட்டிக்காட்ட ஒரு ஆளுமில்லை. தப்பிதவறி அப்படியொரு ஆளிலிருந்தாலும்., பேச அனுமதியில்லை!!. அனுமதி பெற்று ஒரு குறிஞ்சிப் பூ பேசுகிறது. தம்பிகள் கேட்டு வையுங்கள். எவ்வளவு கேட்டிருப்போம்?. கியூபா.. பொலிவியா... இன்னும் எங்கெங்கு நடந்தன புரட்சிகள்... அத்தனையும் நமக்கு அத்துப்படி. நமது நாட்டிலும் புரட்சிகள் உண்டு., புரட்சிப் பட்டங்கள் இன்றும் உண்டு தலைகளுக்கு. உண்மையில் புரட்சி மக்கள் மனதில் வர வேண்டும். புரட்சி என்றால் டங்கு, டங்குன்னு இடிச்சுகிட்டு விழுகுறது இல்ல... அமைதிப் புரட்சி... மக்கள் ஆளுமையில் புரட்சி... தாழ்வுணர்வு தன்னுடமை (உடமையென்றால் பொருள் மட்டுமல்ல) அறியாதவருக்கு வரும். தான் யாரென்பதை புரிந்துகொண்டால் எல்லாம் மாறும். நம்மிடையே இன்று இருப்பவர்தான் நாளைய தலை., ஆளுமையுடைய சமூகத்திற்கு இத்தலையே விதை.
இன்னும் நாலைஞ்சு நாள்தான்., வந்துருவோமில்ல... ! இந்த நேரத்துல வெளியூரு போனா கட்சியவிட்டு காணமப் போன மாதிரியாருவோம்னு தெரிஞ்சதுதான் ஆனாலும் துரவறமே பூண்டாலும் கூட்டி வந்து கொ.ப.செ ஆக்கற ஆளுகல்ல நம்ம., அந்த தைரியத்துலதான் விடுமுறை எடுத்தேன் :)). ஆசிப் மீரான் அவர்களின் நட்சத்திர வாரத்தை தவற விட்டுவிட்டேன் போல. வருத்தமா இருக்கு. நம்ம கில்லிகளின் பதிவுகளும் பல விட்டுப்போய்விட்டது :). படிக்க வேண்டும். கூட்டம் கொஞ்சம் அதிகமாயிட்ட மாதிரி இருக்கு... இல்ல... தேர்தல் நேரங்கிரதுனால எனக்கு அப்படித் தெரியுதா? 'உண்மையிலேயே' புதிதாக எழுத வந்துள்ள புதிய வலைப்பதிவர்களுக்கு வாழ்த்துக்கள். இவ்வளவு பேசுற நீ யாருன்னு புதிதாக வந்தவர்கள் கேட்டீர்களேயானால்... தமிழ் மணத்தில் கொஞ்சம் உட்புகுந்து பார்த்தால் 'நஞ்சு மரம்', 'உலர்ந்த மரம்' ' ஆலமரம்... பாலமரம்'னு ஏகப்பட்ட விளம்பரம் மரத்திற்கு உண்டு. மரத்தைப் பிடித்து ஆடிப்பார்க்க பார்க்க பெண்களுக்கு கூட ஆசையிருக்குதுங்க :))))). இருக்க வேண்டியதுதானே?., இது ஒரு நியாயமான அசைதான்.... மரம் மேலே விழுகும் வரை 'எல்லோரும்' ஆடிப் பார்த்துக் கொள்ள வேண்டியதுதான்.., ம்...! என்னா சொல்றிங்க??.